EDITORYAL - Kinsa pay ubang mga senador sa pork scam

Nahidugang sila  si Senador Vicente Sotto III, ug  Ferdinand Bongbong Marcos  sa listahan  sa  mga  nakiglambigit kang Janet Lim Napoles.

Kini gawas  kanila ni Senador Juan Ponce Enrile, Gringo Honasan, Jingoy Estrada ug Bong Revilla.

Kinsa  pa  kahay dugang  mga senador  nga  molutaw sa giingong  pagpanghilabot  sa minilyon  ka pesos nga alang  unta  sa  nagbaguod  sa kalisud  nga  mga  Filipino.

Apan tua  mahipunta ang  maong  minilyon  ka pesos  nga kantidad  sa bulsa nilang  nagsugwak  na  sa kadaghang  kuwarta.

Gipa-eksplikar  sila  sa  Malacañang  sa ilang  pagtumbok  og  NGO  nga  iya  ni Napoles  nga  palutsan  sa maong  salapi  nga wa mag-agi og  subasta  kon  bidding.

Ngano  kaha  nga  kasayon  ra nilang  milingla  sa mga  kadagkoan  sa Department of Budget and Management  aron  nga  ipagawas  sa  minilyon  ka pesos  nga kantidad  sa salapi  gikan  sa ilang    pork  barrel?

Aw basin  ang  mga  molupyo  sa barangay  ug  kalungsoran  wa  na  tingale  ganahi  og  pangayo  kanila  og  mga  proyekto, hinungdan  nga aron  makagawas  ang  ilang  pork, gipaagi  na lang  nila  ni  Napoles.

Unsa  ba diay  ka-kompleto  sa panginabuhi, infrastraktura, edukasyon,  panglawas  ang  matag  barangay ug  lungsod  sa tibuok  nasud  nga wa na man  kapangayo  og  tabang  gikan  sa maong  mga  magbabalaod? Mao ba? unya gisugo  ba  sila pagbulsa sa ilang  pork?