Harassment team sa pier

Maayong susihon ni Mayor Mike Rama ug Cebu City Police director Sr. Supt. Noli Romana ang reklamo sa mga tagdumala og trucking companies batok sa giingong “harassment team” nga nagharang og mga dagkong trak de karga sa pier area.

Niadtong miaging semana, nabulabog ang pier tungod sa presensiya sa mga unipormadong polis nga namabag sa mga trak nga mogawas-sulod sa pier aron pagkarga og mga kargamento gikan sa Cebu International Port (CIP).

Walay kuwestiyon ang ingon niining operasyon sa atong kapolisan, tungod kay trabaho nila ang pagpatuman sa kahapsay ug kalinaw sa bisan asang karsada sa dakbayan.

Apan nabalaka ko sa report nga akong nadawat nga ang mga operatiba nanghadlok ngadto sa mga operator ug representante sa mga trucking company nga gisugo diay silang Supt.Rey Yanger Tiempo.

Sa akong pakisusi, nahibaw-an nga si Tiempo diay maoy hepe sa Cebu City Traffic Division, nga ubos sa Cebu City Police Office.

Maayong susihon ni Mike ug ni director Romana ang pasangil sa mga truckers nga ang grupo ni Supt. Tiempo nangayo og P10 ngadto sa P15 mil ang buwan ngadto sa mga truckers bugti sa proteksiyon.

Unsa kaha nga klaseng proteksiyon ang gihatag sa grupo ni Tiempo ngadto sa mga trucking companies?

Posibleng dili na lisud-lisoron kun magdagan sa kadalanan sa siyudad gikan o paingon sa CIP magkarga og mga imported nga kargamento. Kadto tingaleng maghatag og binuwan nga “protection money” dili na parahon (flagdown) ug dili na lisudlisoron sa rehistro ug prangkisa.

Apan ang nakakurat kay namasangil ang mga operatiba nga nangangkong mga sakop ni Tiempo nga “composite team” diay sila nga gilangkoban sa tulo ka units – ang Cebu City Traffic Division pinanguluhan ni Supt. Tiempo, Cebu City Traffic Operations and Management (Citom) ug sa Highway Patrol Group (HPG).

Nasayod ba kaha si Ruben Almendras, ang bag-ong chairman sa Citom, niining maong pasangil sa mga truckers?

Adunay nagsulti kanako nga gipaabot na ngadto sa Police Coordinating and Advisory Council (PCAC) sa siyudad sa Sugbo ang maong report.

Apan sa kasamtangan, atong awhagon si Col. Romana sa pagsusi niining maong pasangil ug paghatag og aksiyon batok kang Tiempo aron masota kun tinuod ba kini.

Ang Ombudsman maayong mosusi usab niini, ilabi na nga naglambigit kini og pangilkil kun tinuod man ang ilang pasangil batok sa mga polis ug mga kawani sa gobyerno.

Dili ko motuo nga mo-tolerate si Romana ug Mike Rama nga adunay “harassment team” diha sa pier area.

* * *

Malampuson ang gihimong opening salvo sa Intramurals 2013 sa Blessed John XXIII Seminary kagahapon pinaagi sa Family Day nga giapilan sa mga seminarista, ilang pamilya, mga pari, formators, magtutudlo ug mga staff.

Ang kalihukan gisugdan sa usa ka Santos nga Misa nga gisaulog ni Fr. Benedicto John Sarchez, ang rektor sa minor seminary, ug mikonselebrar silang Fr. Glenn dela Torre ug Fr. Eugene Narciso.

Human sa misa, gisunod ang parade nga giunhan sa mga majorette ug drum and bugle corps sa University of the Visayas.

Tulo ka mga pari ang mihimo sa relay pagdagkot sa Olympic torch, silang Fr. Jose Larida, Fr. Kit Sestoso, Fr. Sarchez ug ang midagkot mao si Fr. Narciso, ang sports director sa seminaryo.

Gisunod dayon ang mga athletics sama sa mga dash ug relay sa mga seminarista, samtang ang mga ginikanan miduwa sa javelin throw, discus throw ug shot put.

Kining inyong suki sa Tikdol nagpakaulaw lang gyud intawon kay sa ikaduhang labay sa discus hapit motugdon sa ulo sa mga ginikanan ug mga maestra nga nagsaksi sa kilid. Puwerteng nakakatawa sa mga pari, mga ginikanan, mga seminarista ug ang nakabahakhak pag-ayo si Ramil, ang property custodian sa seminaryo. Hehehe.

Apan nakurat ang mga ginikanan sa gipakitang talento sa  ilang mga anak nga seminarista pinaagi sa Dance Palabas, diin ang among team, ang Team Moses, maoy nakadaog.

Samot ko nga nakurat sa talento nilang Fr. Narciso ug ni Fr. Dadi Villaluna, kay samtang nagkaskas sa gitara si Fr. Narciso ug nagkanta, si Fr. Villaluna, ang spiritual director sa seminaryo, nag-juggle sa mga bola sa tennis ibabaw sa entablado. Ngilngig og talent mga paria, singer ug   juggler!

Niining semanaha, magduwa ang mga seminarista sa bisan unsang paugnat sa kusog sama sa basketball, soccer, volleyball ug badminton.

Tapuson kini unyang Biyernes pinaagi sa usa ka programa nga himuon sa covered court sa seminaryo.

Kaninyong tanan diha sa Blessed John XXIII Seminary, salamat sa paglingaw kanamong mga ginikanan sa mga seminarista!