Ikasiyam nga panganod ni Rama

Mao diay’ng gaan kaayong buot ni Cebu City Mayor Mike Rama dihang nag-abot mi sa JRG Halad Museum atol sa pagpasidungog ni Dr. Jose "Sir Dodong" Gullas sa mga kabanay sa bag-ong nitaliwan nga mga higante sa Sugbuanong musika nga silang Maestro Mil Villareal ug Susan Fuentes niadtong Domingo.

Gawas nga nagkita silang kanhi mayor Tomas Osmeña ug iyang ig-agaw’ng si Anabelle Rama, nagkatapad sila’g lingkod sa ayroplano gikan sa Manila paingon sa Sugbo niadtong Sabado sa buntag. Samtang relasyon ra nilang Anabelle ang nagkauli, nagkatinagdanay silang Osmeña. Nakatabang pa gyod pagkuha sa bagahe ni Osmeña gikan sa ibabaw sa ilang lingkoranan.

* * *

Niabot si Rama sa museum nga wa pa magsugod ang kalihokan. Nga talagsaon na lang mahitabo tungod sa kadaghan sa kalihokan nga kinahanglang tambongan ug sa iyang talento pagyango sa tanang imbitasyon nga madawat. Nananghid siyang Sir Dodong nga mobiya kadiyot aron makatambong sa nagpadayong protesta sa Plaza Independencia batok sa pork barrel system.

Nahibalik siyang mao pay pagsugod sa programa. Wa na mobiya hangtod nahuman. Gani nidiskurso pagpasalig nga motabang ang iyang pamunoan pagpalambo sa awit ug kinaiyang Sugbuanon ug nikanta pa sa iyang bersiyon sa obra maestra ni Allan Jayme Rabaya nga "Kausa Nabasa ang Tubig."

* * *

Mora pa tingaling naglutaw sa kalipay si Rama kay mao pa may pagka-uli sa maayong kabubut-on nilang Anabelle. Nilungtad gyod og kapin sa upat ka buwan ang ilang away human nangluod si Anabelle sa giisip niyang pagbudhi sa Team Rama niya sa piniliay niadtong Mayo. Gikan sa Mactan-Cebu International Airport nidiretso sila sa Basilica del Sto. Niño aron pagpasalamat nga nahuman nang ilang away.

Nga bililhon sa kalinaw sa politikanhong kinabuhi ni Rama. Kinsa nag-atubang ron og kaso sa Comelec. Pinasikad sa giingong kapakyas niya pagtug-an sa Comelec sa gibandilyo ni Anabelle nga dakong amot sa iyang kampanya. Mapukling ang kaso kun bakwion ni Anabelle ang kasayuran.

* * *

Apan nagduda ko nga ang wa paabutang panagtagbo nilang Osmeña maoy nibayaw ni Rama. Nataligam-an ba lang o gituyo gyod sa mga kawani sa ayroplano nga magkatapad silang tulo, nga si Anabelle ang naa sa taliwa, makahuloganon alang ni Rama nga wa maghasol si Osmeña pagpangasaba sa mga tripulante ug pagdemanda nga ibalhin siya og laing lingkoranan.

Bisan wa magkabayloay og mga pung gawas sa pahiyom ni Rama ug agumod ni Osmeña, nakapalipay pag-ayong Rama nga si Anabelle ray nag-uwang nila sa kapin sa oras sud sa ayroplano. Iyang kanhi padrino sa politika nga way pupanaganang niagak ug nanginsulto niya sa kapin sa duha ka dekada karon iya na lang constituent nga samtang niprotesta sa iyang kadaogan nag-atubang sa kahigayonan nga di na makabalik ni makapalagpot ni Rama sa City Hall.

* * *

Email: [email protected].