Nayabag na ang DPWH

Dungan sa kagubot kagahapon sa Estados Unidos sa Amerika tungod sa “government shutdown” tungod sa kapakyas sa ilang Kongreso pagpasar sa ilang budget pagtapos sa ilang fiscal year, nagubot usab ang Bureau of Customs sa Pilipinas tungod sa sunodsunod nga memo ni Customs Commissioner Ruffy Biazon.

Apektado ang 27 ka mga Collector V ug Collector VI sa BOC sa bag-ong memo ni Biazon tungod kay gipangbutang kini sa floating status ug gidestino gawas sa BOC, ang bag-ong gitukod nga Customs Research and Policy Office (CRPO). Sa 27, adunay 17 ka mga abogado nga Collector V samtang upat sa Collector VI.

Ang mga apektadong opisyal nakakita hinuon og daghang violation sa bag-ong memo ni Biazon. Kini mao ang pagpakanaog niini samtang gipatuman na ang election ban, pagdestino nila gawas sa BOC, pag-isyu og “memo for” nga komunikasyon aron ipagawas nga dili kini “personnel designation” sa mga OIC nga mopuli sa mga kolektor pagdumala sa mga puwerto ug klarong abuso sa katungdanan tungod kay sila lamang mga Collector V ug Collector VI ang gibutang sa floating status.

Tungod niini, nakapangayo sila og 72-hours temporary restraining order (TRO) nga nagmando sa dili una pagpatuman sa Customs Personnel Order No. B-189-2013 nga nagdestino kanila sa CRPO.

Sa Customs sa Cebu, milingkod nga OIC si Atty. Paul Alcazaren nga naghupot sa posisyon nga Collector III.

Taym pa ra gud, unsa ka tinuod nga kini si Commissioner Biazon, anak ni kanhi Senador Rodolfo Biazon, usa lamang ka medical technology graduate? Wala diay kini kalibutan sa Customs and Tariff Code of the Philippines. Nganong gihimo man kining customs commissioner?

* * *

Maayong ipasabot sa Department of Public Works and Highways (DPWH) ngadto sa mga residente sa Lapulapu nganong mipatrabaho kini sa Mactan Circumferential Road nga wala diay klarong Special Allotment Release Order (SARO) alang sa pundo niini.

Usa usab sa ilang angay ipasabot nganong ilang gipatrabaho ang karsada sa Lapulapu nga wala gani makig-alayon sa mga stakeholders ilabi na sa mga tag-iya og resorts kang kansang mga guests nahisalaag tungod sa rerouting. Nabiktima pud ko ani.

Pero dili angay pakasad-on og apil ang kagamhanan sa Lapulapu kay ang responsable pagpagawas anang SARO ang DPWH man. Unya ang nagpasubasta nianang trabahoa, mao man ang DPWH diin ang midaog isip lowest bidder mao ang kontraktor nga Gonzalodo.

Samot na nga mismo si Mayor Paz Radaza nagpakisusi sa kahimtang sa proyekto sa dihang iyang nasayran nga wala diay kini budget.