EDITORYAL - Ang rally batok pork barrel

Gipakita  sa katawhang Sugboanon  pinaagi  sa rally  nga  gihimo   gikan sa Fuente Osmeña  paingon  ngadto sa Plaza  Independencia ang  kalagot  ug  kapungot  niini  sa mga  magbabalaod  nga  mibulsa  pag-unay  sa ilang  pork  barrel.

Tingale  kompiyansa  ra  kaayo  sila  kay  sa  kadugay  na  niining  pork  barrel  nga  gipiyal  kanila sa kagamhanan, gipasagdan  ra  kini  sa  katawhan.

Sa  milabay’ng  mga  katuigan  murag  wa  maghunahuna  og  binuang ang  mga  magbabalaod  niini.

Apan  dihang  nasuta  nila  nga  mahimo ra diay  nilang  ibulsa  ang  maong  minilyon ka pesos   nga  kuwarta  pinaagi  sa pakigkonsabo  sa  usa  ka  babaye  nga  isug  kaayo  sa  pangurakot,  milampos sila.

Ning  tungora  milihok  ang  mga  tawo  kinsa  gianugonan  sa binilyon  ka pesos  nga  nawagtang  sa panudlanan sa goberno  gumikan  sa  anomalusong  buhat  sa  mga  magbabalaod.

Kinsa  ba  usa’y  malipay  nga  ang  maong  salapi  imbis  daghang  gigutom  nga  hamtong  ug  gagmay’ng  kabataan ang  mapakaon, nahipunta  ra man  ngadto  sa mga  magbabalaod  nga daan  nang  busog  ug  kuwartahan. Nagtuo  ang  kadaghanan  nga  dili  na  piyalan  sa kagamhanan  ang  mga  magbabalaod  sa dagkong  bahin  sa salapi  niini.

Pinaagi  sa hiniusang  tingog sa  katawhan  nagtuo  ang  mga  Filipino  nga  mauwaw  na ang  mga  magbabalaod  sa pagpatigbabaw pagkupot  og  pork  barrel.