Ang MNLF ug ang ilegal nga drugas

Milungtad na og daghang mga adlaw ang pagsinukliay og bala  sa mga  sakop sa  Moro National Liberation Front (MNLF) batok sa mga sakop sa  puwersa sa kagamhanan sa dakbayan sa Zamboanga.

Daghan na ang naangol ug nakalas nga kinabuhi dili lang sa kasundalohan kun dili lakip na usab sa mga sibilyan nga napagan sa maong kagubot nga gipasiugdahan sa nahisgotang armadong pundok sa Mindanao.

Si Presidente Noynoy Aquino nga atua karon sa maong dapit alang sa pagpakita sa iyang suporta sa kagamhanan ug pagtan-aw sa kahimtang sa nagkalisod nga kahimtang nga mga molupyo.

Gikataho na hinuon sa puwersa sa kagamhanan nga bisan kun nagpadayon ang ilang panagsakbang apan ilang namatikdan nga nagkaanam na og kahuyang ang puwersa sa MNLF nga maoy hinungdan sa pagtahan sa pipika kanila ug temporary na karon nga gitanggong sa bilanggoan.

Bisan pa man niining maong taho sa gihapon daghan ang gibati og katingala kun ngano nga nakalahutay man sulod sa daghan na nga mga adlaw sa pagpakigbinakbakay ang mga sakop sa MNLF nga wala man gayod kahutdi sa ilang supply sa bala ug armas.

Dili lang ang katawhan karon ang gibati sa maong katingala kun dili lakip na usab  si Presidente Aquino nga maoy hinungdan nga nagtinguha na karon ang iyang pamunoan sa paghimo og pakisusi.

Ang pagbaton og daghang armas ug daghang bala sa mga sakop sa MNLF sa Mindanao daw susama usab og kahimtang sa nagpadayon karon nga pagdagsang sa ilegal nga drugas dinhi sa nasud.

Daghan na ang nasakmit sa atong mga tinugyanan sa balaod nga ilegal nga drugas ug daghan na usab ang nadakpan nga ang pipila gani kanila  nangabalhog na sa bilanggoan.

Ang mga bala, armas ug ilegal nga drugas kun wala man gani naggama niini dinhi sa Pilipinas  labing siguro  nga gidala kini sa nasud og mga tawo pinaagi sa ilang pagpalusot.

Ang makapatingala kay higpit man unta nga gibantayan ang airport, ang pantalan nga maoy dunggoan sa barko gikan sa nagkalainlaing lugar ug ang mga  terminal sa  mga bus nga sakyanan apan nganong nakalusot man kini nga wala makamatikod  ang atong mga tinugyanan sa balaod.