Tago lang mo

Daghang mga PUJ driver nga nangutana kanako kun unsay mahitabo sa mga naisyuhan og bench warrant kay wala magtagad sa ilang multahan mao nga nagtipun-og ang ilang kaso.

Wala kaayo ko ganahi motubag. Unsaon, nasabot nako nga ang mga nangutana mao kining mga badlongon nga drayber nga panahon nga madakpan moingon dayon “Citation lang sir ha? Ayaw lang na’ng T-O-P.”

Ang usa miingon nga labaw pa kuno sila sa kriminal nga pangdakpon nga unta naa may daghang snatcher nganong dili kini ang gipangdakup.

Buyno, kamong mga drayber og PUJ, taksi ug bisan sa mga private vehicles, tumana ninyo ang balaud sa pagmaneho aron dili kamo madakpan.

Ako pagkadugay na nako nga nahimong drayber apan gatarong g’yud ko sa akong pagmaneho.

Sukad-sukad gud, mga upat ka tuig, na man ko nga nahimong LTO deputized agent, usa pa ka drayber nga akong nadakpan nga una siya kanako og duha ka tuig nga nakakuha’g lisensya.

Daghan diha nga mga drayber nga mga edad-edaran na apan dili pa kana sila dugay naisyohan og lisensya. Ako 1977 pa nag-drive na ko’g sakyanan ug nagbasa kanunay sa mga balaud sa pagmaneho.

Ang akong tambag, ayaw g’yud pag-abuso. Unya kun madakpan gani, ayaw pagdala og mga ngalan nga bisan kinsa na lang aron dili kamo dakpon kay kun ako ang makadakup dili g’yud na mosalir.

* * *

Akong dasigon si Raquel Arce, ang amiga nako nga market administrator nga dili mahadlok, sa hulga nga siya patyon. Ipadayon ang imong kaisog ma’am sa pagpatuman sa balaud ug pagpahapsay sa karsada.

Lahi si Raquel kay ni anhing “Jojo” dela Victoria nga gitambagan nako nga magdala’g armas nga moingon lang itugyan ra kuno niya’s Ginoo ang iyang kinabuhi.

Si Raquel andam sa tanang higayon. Suwayi ninyo kay basin kamo nga nagplano pagpatay niya, mao hinoo’y masulod sa lungon. Pwerte ra ba’ng hingigoa aning Raquel gamit aning bag-o niya nga armas.

Ingon ana man g’yud na, kun motrabaho pag-ayo ang usa ka kawani ug opisyal sa kagamhanan nga gitugyanan pagpatuman sa balaud, duna’y mga tawo nga masakitan ug maoy magplano og dautan.

Pareho ra’ng pataya. Kun mamatay sa hilanat walay dungog, apan kun mamatay sa paglaban sa iyang katungod ug pagpatuman sa balaud, dungganan pa. Fight Ma’am Raquel!!!

* * *

Uy, magtapok-tapok man diay ang mga sakop sa KBP karong gabii no? Adto ta sa Capitol Social Hall. Tan-awon nato og unsay kaayohan didto. Siyaro, katapusang adlaw sa usa ka buwan nga kasaulogan sa KBP Month?

Daghan g’yud hinoon ang gimingaw sa pagdumala nila ni Ruphil Bañoc ug Carlo Dugaduga.