Dagan alang sa kinaiyahan

Tagam na mi. Di na mi gusto nga masubli ang kayagaw sa rehistrasyon sa nangagi namo nga Kapamilya Run. Maong wa mi magsugod pagpanlista sa mga managan sa Kapamilya Run (One Run One Philippines) karong Oktubre 6, 2013 hangtod nga natahi ug naprintahan na ang opisyal nga run shirts.

Tungod sa mas komplikado nga desinyo, kay managlahi ang kolor sa run shirts sa tulo ka kategoriya (lima ka kilometro, napu ka kilometro ug 21 ka kilometro), sa niaging weekend pa mi makapundo og igong gidaghanon. Maong nakahukom mi nga sa Lunes na sugdan ang rehistrasyon. Uban ang sabot nga mohunong mi pagpangrehistro kun mahurot nang run shirts.

* * *

Nagbaha dayon ang mga nagpalista sa duha ka registration centers sa Kapamilya Run:

-Cebu City Sports Center (alas-6 hangtod alas-9 sa buntag ug alas-4 sa hapon hangtod sa alas-8 sa gabii); ug

-ABS-CBN Regional Broadcast Complex sa Jagobiao, Mandaue City (alas-9 sa buntag hangtod alas-6 sa gabii).

Abli ang registration centers matag adlaw, apil na sa Sabado ug Domingo. Puwa ang run shirt sa 21 ka kilometro nga lumba, berde alang sa napu ka kilometro ug asul sa lima ka kilometro. Atol sa rehistrasyon makuha dayon ang run shirt, race number, mapa sa ruta ug mga lagda sa pag-activate sa rehistrasyon online.

* * *

Igahin ang matigom sa Kapamilya Run sa pagpalambo sa fish sanctuary sa Daang Paz, Poro, Camotes. Nga napilian sa ABS-CBN Foundation uban ang tabang sa buhatan ni Cebu City Councilor Nestor Archival. Naggusbat ang sanctuary busa nagkinahanglan og dinaliang tabang. Palapdan ang kabakhawan aron mahatagan og dugang pinuy-anan ang mga isda ug ubang katigayonan sa dagat.

Mao ni registration fees: P300 sa lima ka kilometro nga lumba; P400 sa napu ka kilometro nga lumba; ug P500 sa 21 ka kilometro nga lumba. May cash prizes ang tanang mananaog. May medalya ang mga makatiwas sa 21 ka kilometro nga lumba.

* * *

Magsugod ug matapos ang lumba sa Northwing sa SM City sa Dakbayan sa Sugbo. Alas-4 sa kadlawon ang warm up sa tanang managan pinaagi sa Zumba. Alas-4:30 magsugod ang 21 ka kilometro nga lumba. Alas-4:45 magsugod ang napu ka kilometro nga lumba. Alas-5 magsugod ang lima ka kilometro nga lumba. Alas-7 himuon ang programa pagpasidungog sa mga mananaog.

Nahimutang ang turning point sa lima ka kilometro nga lumba sa Arellano Boulevard unahan sa eskina V. Sotto, sa napu ka kilometro nga lumba tungod sa bodega sa Ludo sa South Coastal Road ug sa 21 ka kilometro nga lumba unahan sa Gaisano Capital SRP Mall. Magbutang mi og water stations apan giawhag ang tanang managan pagda og sudlanan sa tubig aron di magpasad ang plastik nga mga baso.

* * *

Email: [email protected]