P3M donasyon ni Annabelle

Usa ka abogado mipasaka og kaso ngadto sa Commission on Election batok kang Mayor Mike Rama tungod sa kapakyas niini pagdeklarar sa iyang Statement of Contributions and Expenditures ug sa Schedule of Contributions sa P3 milyones nga donasyon sa iyang ig-agaw nga si Annabelle Rama.

Si Atty. Rey Delute nga taga Basak-San Nicolas misang-at sa kaso tungod sa matud niya paglapas ni Rama sa balaod sa eleksiyon.

Duha ka schools of thought akong gituohan nganong wala itug-an ni Mike ang P3 milyones gikan sa ig-agaw niyang kandidata pagka-kongresista sa north district: una, walay nahatag nga donasyon si Annabelle, ug ikaduha, wala igasto ni Mike ang maong kantidad alang sa iyang grupo niadtong Mayo 13, 2013 nga eleksiyon.

Kun tinuod nga adunay P3 milyones nga donasyon si Annabelle ngadto kang Mike, kinahanglang iprobar kini ni Atty. Delute pinaagi sa usa ka resibo. Kun wala, hearsay ang estorya sa donasyon. Kun wala itug-an ni Mike sa Comelec ang P3 milyones nga donasyon ni Annabelle, tinuod ba kaha ang estorya nga wala kini niya gastoha sa eleksiyon?

Tanang kandidato pagka-kongresista sa Team Rama nga silang Annabelle ug Atty. Totol Batuhan (south district) pulos nangapilde.

Sa tanang kandidato pagka-konsehal sa Team Rama, upat lamang ang nakalusot, silang Konsehal Mary Ann delos Santos sa north ug silang Dave Tumulak, Hans Abella ug Ronald Cuenco sa south.

Kun tinuod nga wala gastoha ni Mike ang P3 milyones, mao lang ba kaha kini ang donasyon nga wala gastoha?

Sumala pa sa mga batid sa eleksiyon, kun migasto pa si Mike alang sa kinatibuk-an niyang slate, hayan makalusot ang usa kun dili duha sa iyang mga kandidato pagka-kongresista ug ubay-ubay sa iyang mga konsehal ang makalingkod.

* * *

Himuon na ang mass burial sa tanang mga nangamatay (ilabi na kadtong walay milukat nga tagtungod) sa pagkalunod sa MV St. Thomas Aquinas sa 2GO.

Dungan sa paglubong sa mga patay’ng lawas, dili angay idungan sa paglubong sa kalimot sa tulobagon (liability) sa barkong ilang gisakyan. Nagpaabot pa usab ang publiko sa resulta sa imbestigasyon sa Special Board of Marine Inquiry (SBMI) aron kini maoy basehan sa pagpasaka og kaso.

Magmabinantayon ang publiko, ilabi na ang mga biktima nga wala mamatay ug mga pamilya sa nangamatay, sa resulta sa imbestigasyon sa SBMI.

Patubagon ang angayang patubagon.