Mamahimo bang kapugngan sa gobiyerno ang pagpanira sa usa ka kompaniya?

Ang atong Labor Code naglatid sa mga katungod sa mga empleyado. Apan samtang gihimug-atan sa balaod ang rights sa mga employees, ila usab nga giprotektahan ang interest sa mga employers. Kini maoy hinungdan nga ang mga employers gihatagan sab og katungod sa pag-terminate sa ilang mga empleyado apan kinahanglan nga pinasubay sa balaod. Apan kun ang usa ka kompaniya mo-terminate sa ilang mga empleyado tungod sa pagpanira niini, aduna pa bay mahimo ang gobierno aron pagprotihir sa katungod sa mga empleyado? Kana nga pangutana ang atong tubagon karon sa atong column.

Dear Atty. Divine,

Nagtrabaho ko sa usa ka kompaniya dinhi sa Sugbo sud na sa lima ka tuig. Karong bag-o gipatawag ming mga empleyado sa among manager tungod sa posibilidad nga hunungon na ang operasyon sa among departamento tungod sa matud pa pagka alkanse niini. Ang plano sa kompaniya nga i-terminate ming mga empleyado ug bayran lang kami nila og separation pay. Ang akong pangutana atty. kun nasubay ba sa balaod kining plano karon sa maong kompaniya? Mamahimo ba kaming mokiha og illegal dismissal kun ugaling ilang ipadayon ang pag-terminate kanamo? Daghang salamat daan sa imong pagtubag sa akong pangutana. More power to your column.  â€”Lucy

Dear Lucy,

Kun kitang mga empleyado adunay mga katungod, ang mga employer aduna say mga katungod. Ang kompaniya o employer adunay katungod nga motaktak o mo-terminate sa ilang empleyado apan kinahanglan nga kining tanan ibasi gyud sa balaod ug aduna gyuy due process. Sa imo nga kaso, kun ang pag-terminate kaninyong mga empleyado naggumikan sa pagsira o paghunong na sa ilang operasyon tungod sa ilang alkanse, prerogative kana sa management. Ang Labor Code naglatid sa mga grounds alang sa pag-terminate og mga empleyado ug usa sa gitugot niini kun ang kompaniya manira na tungod sa pagka alkanse. Ang kaso nga illegal dismissal mamahimo lang mapasaka sa empleyado batok sa iyang employer kun ang pagtaktak kanila wa masubay sa balaod o gitumong aron sa paglikay sa ilang mga tulubagon sa ilang mga kawani. Ang Korte Suprema aduna nay mga desisyon kalabot niining pagpanira sa mga kompaniya basi sa Article 283 sa atong Labor Code nga moresulta sa pagka-terminate sa mga kawani, matud sa Supreme Court nga “an employer can lawfully close shop anytime. Just as no law forces anyone to go into business, no law can compel anybody to continue the same . . . Management’s exercise of its prerogative to close a section, branch, department, plant or shop will be upheld as long as it is done in good faith to advance the employer’s interest and not for the purpose of defeating or circumventing the rights of employees under the law or a valid agreement (Alabang Country Club v. NLRC, G.R. No. 157611, 9 August 2005)”. Sa ato pa, kun ipadayon sa inyong kompaniya ang pagsira sa inyong departamento wa na gyud tay mahimo niini. Hinaut nga akong natubag ang imong pangutana. Atty. Divine

•  Alang sa inyong mga pangutana, ipadala lang sa Legal Corner sa Banat News or email sa [email protected] ug akong tubagon ang inyong pangutana pinaagi sa akong column matag adlaw’ng Miyerkules ug Domingo pinaagi sa akong column.