Halaa, buaya!

Usa ka 40 anyos nga lalaki didto sa Amerika ang gidakop sa kapolisan gumikan sa krimen nga wa pa niya buhata.

Si Geoffrey Portway, taga Worcester, Mass., nahibaw-an nga nagplanong mangidnap og mga bata nga iyang ripon (lugoson), unya patyon ug kan-on.

* * *

Suma pa sa balita uso karon ang panagchat-chat sa Internet sa mga pedophile diin ang giistoryahan niini mao ang pagpangidnap, panglugos, pamatay og mga bata ug pagpangaon sa mga bata nga ilang pinatay.

* * *

Usa ka giant crocodile kon buaya ang napalgang natug ilalum sa katre sa manager sa usa ka hotel didto sa Zimbabwe.

Dakong kurata ni Guy Whitall, manager sa Humani Hotel/Lodge, dihang nasakpan niya ang 8-foot, 300 pound nga buaya ilalum sa iyang katre.

Wa niya himatikdi ang buaya kun wa pa misyagit ang housemaid nga maoy nakasakop niini.

* * *

Adtong miaging semana, mga alas onse  sa gabii nahibung ko nga dunay naglihok-lihok ilawom sa akong katre. Perting kurata nako dihang kalit nidagan ang usa ka dakong iring sa akong paglili ilawom sa katre.

Kinahanglan gyud diay lilion ang ilawom sa atong katre sa dayon na tang matug. Basin naay buaya dili lang iring. Hehe.

* * *

TRIVIA. Maayong adlaw sa atong mga higala diha sa North Bus Terminal lakip na ang mga pasahero, bus driver/konduktor ug mga kawani sa terminal. Daghang salamat  sa inyong suporta sa Banat News.