Nagtakoban sa plastik nga kinaiya

Nagkaduol na ang bulan sa Oktobre niining tuiga ug dili na gayod kapugngan pa ang paghinayon sa barangay eleksiyon gawas lamang sa Sangguniang Kabataan (SK) nga kaduhaduhaan pa.

Gumikan sa nagkaduol nga mga adlaw sa pagpahigayon sa barangay election maoy atong namatikdan ang nagkadaiyang kalihokan sa mga sitio sa kabarangayan sa pipila ka molupyo nga mapahiyomon ug matinagdanon na kaayo sa mga silingan.

Ang mga barangay opisyal nga naglingkod nga magpasubli sa ilang katungdanan kanunay na usab nga nagpabantang sa ilang katuyoan kay nagpasiugda na man kini og mga pulongpulong nga maoy ilang gihapin nga pasangil ang konsultasyon sa mga proyekto ug programa niining gipatuman.

Ang wala pa maghupot sa katungdanan  nga wala usab magpabintaha maoy ilang gihimong paagi ang kanunay nga pagpakita sa panahon sa panagtapok sa katawhan sa pagtugbang sa mga naglingkod nga barangay opisyal nga mahimo niining kaatbang.

Dugang nga gihimo mao ang pagsuroy sa matag purok, matag sitio sa ilang barangay ug  ang pagpakita kanunay sa pagsuporta sa kalihokan sa piyesta, liga sa basketball ug uban pa.

Bisan gani ang mahiligon sa sugal sama sa pagpasiugda og tigbakay sa panahon sa piyesta o kanunay nga pag-esponsor og  kalingawan sa panahon sa ilang tinuig nga pangilin sama sa variety show, drama sa entablado makadugang man kini sa kalig-on sa kandidatura.

Hinuon kun ang ilang pagpakita sa maong matang sa kinaiya nga dili maoy naandan nga gihimo daghan usab ang  bation og katingala ug gani ang pipila ka mga silingan nga maoy nasinati ug nakaila kaniya magtuo man usab nga  nagtakoban lamang kini sa plastik nga kinaiya.