Laing panglabni atubangan mismo sa PLDT

Niay laing hapdos nga hitabo diha atubangan sa PLDT nga giasoy mismo sa suki nakong tindera. Matud niya nga niining bag-ohay lang, wala pa usa ka semana ang milabay (sa pagsulat niini) naluoy siya sa tigulang lalaki, 70 anyos kapin na ang panuigon, kinsa nag-estambay diha sa may dapling kalingkoran sa PLDT kay nanginabuhi intawo’g pamaligya’g prepaid TM ug SMART loading cards.

Luyo sa kahayag sa kabuntagon, adunay taksi nga mihunong tungod sa gilingkoran sa tigulang ug gikamay kini sa pasahero nga diha maglingkod sa front seat. Nagwarawara ang pasahero sa iyang tibuok P500 kay gustong mopalit og prepaid card. Ang tag-P300 maoy gipili.

Dihang nahatag na sa senior citizen ang card, gidawat niya ang tibuok P500 gikan sa pasahero. Sanglit suklianan kini’g P200, nangapkap siya sa iyang bolsa, namasin nga may igong kantidad nga iyang ikasukli. Pastilan, wala man! Moto nga nahinumdom ang tigulang nga may gitagoan diay siyang linikit papel de banko sa sekreto niyang bolsa. Iya kining gipagawas . Apan naunsa ba, nga hakpon bitaw na tanan sa pasahero gikan sa huyang nang mga palad sa tigulang. Unya, gilabni. Ug dihadiha ... misirit pagpadagan ang taksi palayo. Mitibi ug mitiyabaw ang alaot, uy!

Puwerting guola sa tigulang. Kapin sa 3,000 ang maong salapi nga nasakiyo sa maong manglabnotay. Grabeng paninguha niya’g tago niadto kay igbabayad kadto sa inangkat niyang prepaid loading cards, diin ang gamay’ng sobra iyang ipalit og tambal.

Masakiton ang maong senior citizen. Dagha’g tambal nga gimintin, diin ang presyo pulos mahal. Siya, bisan nagkangokango na, naningkamot nga mabuhi sa minatarong nga paagi, gipasipad-an lang gihapon sa mga batan-ong binuhat nga daotan. Pagka walay kasingkasing sa maong mga hinanib ni Satanas nga kanunay’ng nagpakabuhi sa kangitngit.

Alang niadtong manglabnotay, unta makonsensiya ka! Iuli na, Bay, kay igpapalit intawon na’g tambal ni Lolo. Ayaw na’g ipang-shabu ... kay dili man na imoha!