Pangluod ni Misuari

Wala na matagad si Nur Misuari sulod sa pipila ka tuig human siya mabilanggo sa kasong rebelyon niadtong 2001.

Apan sa mga nakaila ni Misuari, usikan sila sa higayon nga gihatag sa gobyerno ngadto kaniya aron pabarogon ang Mindanao human mahimong “final” ang pagpatuman sa Tripoli agreement – ang gikasabutan tali sa gobyerno sa Pilipinas ug sa Moro National Liberation Front nga gipangulohan ni Misuari pagbutang og kalinaw sa habagatan.

Sama sa panahon nga giusikan ni Misuari, nausik usab ang mga probisyon sa Tripoli agreement. Diha sa maong agreement natukod ang Autonomous Region in Muslim Mindanao (ARMM) ug ang pag-integrate sa mga rebelding MNLF ngadto sa Armed Forces of the Philippines (AFP).

Tumong sa maong kasabutan ang paghiusa sa mga Muslim sa Mindanao, pag-abag sa gobyerno nga mahatagan og kasulbaran ang dugay nang suliran sa habagatan ug pagtubag sa mga yangongo sa mga Mindanaoan.

Natuman ba kini sa pagpangulo ni Misuari?

Pagsulbong sa Moro Islamic Liberation Front (MILF) nga faction gikan sa MNLF, misugod ang pagduda sa kapabilidad ni Misuari paghiusa sa mga Muslim.

Niadtong 2001, gi-atake sa hugpong ni Misuari ang Zamboanga city. Ug sa dihang nakigsabot ang Pilipinas sa MILF, nangluod si Misuari kay napadaplin siya ug ang iyang MNLF.

Sa dihang gipirmahan ang Framework Agreement alang sa Bangsamoro state sa Mindanao, misamot og ulbo ang kaspa ni Misuari.

Niadtong Lunes, mibalik ang hugpong ni Misuari sa Zamboanga city ug sama niadtong 2001, namihag sila og gihimong human shield batok sa mga sundalo sa kagamhanan nga milutos kanila.

Sa akong nakita, ang kagamhanan sa Pilipinas luag ra kaayo alang sa paghatag sa gusto sa mga kahugpongan sa mga kaigsuonan natong mga Muslim didto sa Mindanao.

Kun magpirmi kini, walay kapaingnan ang bisan unsang sabotsabot.

Ug maggubot ang Mindanao hangtod sa dayon.

* * *

Mga 492 ka mga residente sa Tabuelan ang nabulahan sa gihimong Bayanihan Program sa Armed Forces of the Philippines (AFP), dili PAF sumala sa migawas sa Community Page sa The Freeman niadtong Septiyembre 1, 2013, didto sa barangay Kantubaon, lungsod sa Tabuelan.

Ang maong Medical Mission ug Civic Action Mission gipangulohan sa AFP Reservists Personnel sa 1901st Ready Reserve Brigade, 7RCDG, Arescom, Philippine Army ug 5th Technical and Administrative Service (Reserve) nga gipangulohan ni Lt.Col. Guy SF D. Gabison III.

Kining maong All-Terrain Medical Relief Organization misuporta sa maong kalihukan pinaagi sa pag-abag og 16 ka mga doktor, samtang ang 34th Infantry Battalion, 8ID, PA, Central Command mihatag og seguridad ug transportasyon.

Akong saludo sa mga Army Reservist doctors ug mga personnel!