EDITORYAL - Ang protesta batok pork ilusad Sept 11

Gituohan  nga mokapin  sa 10 mil ka tawo ang  mosalmot sa protest rally batok sa  pork barrel nga ilusad  sa Fuente Osmeña sa dakbayan  sa Sugbo sa Septiyembre 11, 2013 alas  6:00  sa gabii.

Ang organizer sa maong rally nga si Stella  Palomo Montaño maoy mopasiugda  niini  ug gisugdan  niya ang  kampanya sa "Fuente Ta" sa iyang  Facebook

Sa tinuod  kuwang  pa  kaayo  ang  maong protest rally aron  ipabati sa katawhang  Sugboanon  nga  makapaputong ang gihimo  sa mga  magbabalaod nga pag-abusar  sa kuwarta  nga  iya sa  mga  magbubuhis.

Ang mga  balita  sa pamantalaan adlaw-adlaw ug  mga sibya  sa radyo  ug telebisyon  nga  nagkondenar  sa mga  binuhatan  sa  mga  magbabalaod  angay  unta  nga  ikauwaw  na nila.

Sa pagkatinuod murag  di lang  tingale  kay P10 bilyones ra  ang  giabusohan  sa  mga  magbabalaod nga  nagpakaaron ingnong gitunto  ni Janet Lim  Napoles.

Ang  katawhang  Filipino nagtuo  nga sa wa pa kini madiskobrehe  daghan  na  nga  mga  binilyon  ka pesos  nga pork  barrel ang  nausik  gumikan  sa binilyako  nga kinaiya  sa  mga  magbabalaod.

Ang tanan  may katapusan,  ug  kun  ang  mga  hingtungdang sad-an  di kasilotan  sa balaod, basin di makatulog  niini  ang  minilyon  ka  mga Filipino.

Ang ilang  pagpuktaw aron wad-on ang  pork barrel angay  unta nga  makapauwaw  sa mga  magbabalaod  kinsa  miunay ra  og  surambaw  sa ilang  mga  suporter.