EDITORYAL - Ang pagwagtang sa pork barrel

Unsa  na man ang  panguwarta  sa mga  magbabalaod  kun wa na  sila’y  pork barrel.

Mura’g  mohuyhoy  ang  abaga  sa  ubang  mga  magbabalaod  kay  gituohan nila  nga  wa na sila’y  koneksyon  kaayo  ngadto  sa katawhan  sa hilit  nga  mga  lugar.

Apan  di  baya  tingale  kay  ang  mga  senador wa man  usab  sila’y  suod  kaayo  nga  mga  pobre  apan  kun  botohan  lang  sa  mga  tawo, makadaug  man.

Ang  importante tingale  nga  di  lang  mabatian  sa  katawhan  nga  makawkaw  sila   sa kuwarta    sa kagamhanan.

Kay  bisan unsa  nimo  kaayo  kun  mamatngunan  sa tawo  nga  may  bisyo ka  sa pagsurambaw  ug  pag-unay  sa  pundo  sa  gobiyerno, bug-at  kaayo  kini og  epekto  sa  hunahuna  sa katawhan.

Masuko  kanimo ang tanan  ilabi  na ang  mga  kabus  kay  sila  man  guy  makaluluoy  kaayo  nga  binuhat  sa kalibotan.

Busa  ang  kagamhanan  mao  unta’y  mosalbar  kanila  kay  mga  tawo  sila  nga  angay  ipahiluna  sa pagpuyo  ug  bisan  sa ilang  panginabuhi.

Apan  kun  ang  kuwarta  nga alang  unta  sa  mga  proyekto  nga  ikaayo  sa mga  kabus,  hilabtan  sa  mga  gipiyalan   nga  mga  opisyal,  aw  di  malipay  ang  mga  tawo  niini.

Hinungdan  nga  mas  maayo  nga  molikay  sa  pangawat aron  mopahuway  man  ka  sa katungdanan, maayo  ka  og  dungog  atubangan  sa mga  tawo.

Naa  man  mo’y  katigayonan nganong  mangawat pa man?