Pork barrel gihapon ta

Human sa million march nga wala makaabot og milyon kaniadtong Agosto 26 ning tuiga diin girehistro sa mga nagpasiugda ug misalmot sa maong kalihokan ang ilang panawagan nga wagtangon na ang pork barrel sa mga magbabalaud, ang simbahang katoliko mopasiugda usab og usa ka kalihokan karong Septiyembre 21 mahitungod gihapon sa pork barrel scam. Ang Septiyembre 21 mao ang adlaw diin gipaubos ni kanhi pangulong Ferdinand Edralin Marcos ang Martial Law o balaud militar kaniadtong tuig 1972.

Sa ubos balay balauranan ang mga kaalyado ni Pangulong Noynoy Aquino nangagni na sa ilang mga kaubanan nga suportahan ang pangulo sa iyang tingoha nga wagtangon ang ilang pork barrel sa tuig 2014 nga nasudnong gahin samtang ang mga senador naglibog pa kun unsay angay nilang himoon sa kontrobersiyal nilang pork barrel o Priority Development Assistance Fund (PDAF).

Ako magpabilin sa akong baruganan nga dili ang pork barrel o PDAF ang suliran ug ang pagwagtang niini dili mao ang pinakamaayo nga sulbad sa suliran sa pagpangawkaw.

Ang kagamhanang Aquino miingon nga ang PDAF o pork barrel wagtangon ug ang maong pundo idirekta na lamang sa paghatag ngadto sa mga ahensiya sa gobyerno aron mao na kini ang mopaabot niini ngadto sa mga angayang makapahimulos niini. Kining maong sugyot peligro tungod kay ang mga ahensiya sa gobyerno nga makadawat sa gahin sa pork barrel kakomboya sa mga magbabalaud sa pagtukob sa pundo.

Sama pananglit sa Department of Social Welfare and Development o DSWD. Ang Commission on Audit o COA sa ilang report miingon nga human nila ma-audit ang gipagawas nga pundo gikan sa PDAF sa tuig 2007 ngadto sa tuig 2009 ilang nasuta nga ang DSWD Central office ug Regional offices (walay labot ang Central Visayas) mipagawas og 107 milyones ka pesos alang sa mga kooperatiba aron ipalit og mga ekipos ug mapabilin ang mga microfinance nga kalihokan niini. Apan subo nga palandungon tungod kay ang giingong mga nakadawat, wala diay makadawat niini. Kining maong kasayoran akong gikutlo sa suwat nga gipadala sa Commission on Audit ngadto ni Department of Budget and Management Secretary Florencio "Butch" Abad nga pinitsahan og  Agosto 14, 2013.

Ang Department of Public Works and Highways o DPWH mipagawas og 50.87 bilyones ka pesos gikan sa pundo sa pork barrel sa mga magbabalaud apan ang maong kantidad dili masubay sa mga taga Commission on Audit. Mismo ang Department of Budget and Management dili makahatag og kompleto nga listahan sa mga magbabalaud nga nagpagawas sa ilang pundo sa pork barrel ngadto sa DPWH nga maoy usa sa nakapasakit sa ulo sa mga auditors aron masubay ang napadulngan sa pork barrel. Ang Department of Agriculture, dili ba kakomboya man sila ni Janet Lim Napoles? Mao ni ang akong giingon nga peligro ug dili lang peligro kun dili dako gayong  peligro sa pundo tungod kay ang mapaingnan niini mga buaya ra gihapong nagnganga.

Ang sulbad sa suliran dili ang pagwagtang sa pork barrel kun dili ang pagbotang og maayong sistema, sistema nga ang naghimo dili ang mga magbabalaud ug mga ahensiya sa gobyerno nga apil sa pagpangorakot. Kun gusto gyod sa gobiyerno ang maayong sistema puwede niyang mapatawag ug pilian ang mga experto ug mga ligdong nga mga tawo sa tibuok nasud aron maoy mohimo og maayong sistema sa pagpagawas sa pundo sa pork barrel nga dili na makurakot. Unya sa sunod nga piniliay, ayaw lang mo pagpili og mga kandidato nga ilado, ang pilia ninyo kadtong dili lang ilado kun dili ligdong usab ang pagka tawo.