Ang komboya

Nagsumpaki ang pamahayag sa mga alipores ni Pangulong Noynoy Aquino sa pagtahan ni Janet Lim Napoles. Si Interior Secretary Mar Roxas miingon nga poydeng mahimong State Witness si mitahan nga si Napoles pero, no way, ang reaction ni Justice Secretary Laila Delima. Sakto si Secretary Delima sa iyang pagsupak nga himoong state witness si Napoles.

Sigun sa Rule 119, Section 17 sa Rules of Court sa Pilipinas ang mosunod mao ang mga rekisitos aron mahimong state witness o saksi sa stado ang usa ka akusado.  Una, gikinahanglan gayod ang testimonya sa akusado para sa Stado; ikaduha, walay laing direktang ebidensiya nga gihoptan ang Stado aron mataral ang mga akusado gawas sa testimonya nga itestigo sa akusado nga gusto sa Stado nga mahimo niyang testigo; ikatulo, ang testimonya sa akusado igo na nga makapuno o makadugang sa pagpalig-on sa kaso sa Stado; ikaupat, ang akusado wala mogawas nga siya ang pinakadako og sala; ug ang ikalima, ang akusado bisan makausa wala gayod mapasaka-i og kaso nga naglambigit og moral turpitude.

Karon sa mga rekisitos nga atong gitagsa-tagsa sa pagsulti, kwalipikado ba si Janet Lim Napoles nga himoong State witness o saksi sa atong Stado?

Angayang hinumduman ni Secretary Mar Roxas nga ang pagkawkaw sa 10 bilyones ka pesos nga salapi sa katawhan wala lang suloha sa mga Senador ug mga Kongresista, nakabahin usab niini si Napoles. Sigun sa ilang sabot 30 ang kang Napoles ug 70 ang sa mga magbabalaud. Busa ang molutaw dinhi mao ang panagkomboya nila ni Napoles, mga Senador, mga Kongresista ug ubang opisyales sa nasudnong kagamhanan, maong silang tanan kinahanglan gayod nga masilotan ug walay palutson sa dakong salaud nga ilang nahimo sa katawhan.

Sa Conspiracy, ang sala sa usa, sala sa tanan busa taralon gayod si Napoles kauban sa mga magbabalaud nga iyang gikasabot sa pagtukob sa salapi nato. Sa ilang kahaniti sa pagtuki ug pag-imbestigar, mapatug-an ra sa mga sakop sa inter-agency si Napoles kun si kinsa sa mga Senador ug Kongresista ang nakasapi sa 10 bilyones nga pork barrel busa wala na kinahanglana ang paghimo niyang State Witness.

Ang si kinsa man nga moinsister nga himoong State witness si Napoles nakabahin.