Kapoy, uhaw sa pagkakonbikto

Marcelo Fernan Hall of Justice --Ang labing kapoy nga bahin sa pagkonbikto ni Regional Trial Court Judge Raphael Yrastorza Sr. nako sa kasong libelo nga gipasaka ni kanhi gobernador Gwen Garcia unom ka tuig nang nilabay mao ang pagbarug. Nilungtad og usa ka oras ug 36 ka minuto ang pagbasa sa 38 ka pahina niyang desisyon.

Tulo silang nagpulipuli og basa sa desisyon, si Yrastorza ug duha ka kawani sa iyang sala. Sa tungatunga sa desisyon, dihang nanghuy na pag-ayo ang akong mga tiil ug bukton, diriyot na ko mohangyo nga magpapuli ko og barug. Maayo na lang nga nakapugong ko sa akong kaugalingon kay peligrong madugangan pa untang silot.

* * *

Haskang mingawa sa sala ni Yrastorza pag-abot nako sa gitakdang oras sa pagpakanaog sa hukom. Sila rang Atty. Celso Espinosa, akong abogado, ug si RC Dalaguit sa DYAB Radyo Patrol ang nagtikaw-tikaw. Gikanselar diay ang mga husay sa ubang kaso gawas sa akong promulgation. Kay tiwason nang recount sa giprotestahang mga boto sa pagka bise mayor sa San Fernando.

Maong gilibotan sa higanteng plastik nga ballot boxes nga pulos may sud nga mga balota ang among husay. Ang pagpalandong sa mas kapoy nga paglinya sa mga molupyo aron lang makabotar niadtong Mayo 13 wa kapuypoy hinuon nakapasamot sa akong kakapoy og binarugay.

* * *

Nagsugod na ko og kabantay nga konbikto ang hukom dihang gibasa nang bahin sa desisyon mahitungod sa akong testimoniya sa kaso. Ang gikutlo ni Yrastorza mao rang mga bahin sa testimoniya nga iyang magamit batok nako.

Nga maoy nakapasamot sa akong kakapoy sa uwahing bahin sa pagbasa sa taas kaayong desisyon. Hibawo nang daan nga pilde ko apan kinahanglan kong molahutay pagbarug kay wa kahunahuna ang huwes pagsusi kun makaagwanta pa ba ko. Salamat na lang nga nagamit ang akong pagbuwad sa init sa ROTC ug pagbarug matag hapon atubangan sa suwaw kaayong mga suga sa studio sa TV Patrol Central Visayas.

* * *

Pagpanggawas na namo sa korte nanghagad ko ni Atty. Espinosa nga maniudto mi sa canteen sa Kapitolyo. Wa pa may alas-dose, kami ray mga kustomer. Nahugno ko pagkahibawo nga wa sila’y bisan usa ka putahe nga isda, paliyang initlogan ray ilang utan ug bugtong sabaw ang sinigang nga baboy. Ambot nahadlok ba lang sa oil spill o ganahan gyod og karne ang taga Kapitolyo.

Gidasonan akong kakapoy sa kauhaw pagkatilaw sa fresh lumpia nga puwerteng parata. Nipauli ko sakay sa crew cab sa DYAB taliwa sa naglingiting nga kadalanan sa mga dakbayan sa Sugbo ug Mandaue. Maayo na lang nga gisugat ko og ice cream sa akong asawa. Kansang kinauwahiang pangutana mao nga kun may trabaho pa ba ko. Kun makabasa mo ini, duna pa tingali.

* * *

[email protected].