Sa gagmay pa akong bata

Septiyembre 1, 2013: Ikakawhaag duha nga Domingo sulod sa tuig

Mga Pagbasa:Sir.3; 17-18,,20.28-29/Sal.68/Heb.12; 18,19,22-24/Lk 14;1,7-14

Graphic kaayo sa akong panumdoman niadtong gamay pa akong bata maong matag pasko ug mga okasyong mahinungdanon kami dayon dapiton sa among mga iyaan sa mother side.

Dili ko makalimot nga samtang naghudyaka ang uban ako nagtungkawo aron sa plato, mga baso,ug mga kutsara manghugas. Dayon inighuman sa salo-salo ipangsulod ang mga salin nga pansit ug bihong nag-uga kay lagi bring house kuno matud pa sa ig-agaw kong wangkig. Karong napari na ako, dili na ko nila pahugason og plato,palingkuron na lang samtang magpaabot sa ihukad nilang pagkaon.

Apan sa daw di na ako ganahang mokaon labina kun sila ang akong ikakuyog. Mao karon nahimong polisiya nga mag-catering na lang kun ugaling dunay mga hikay. Ang akong prinsipyo dili ko gusto mohago og tawo ug kun mohago man gani hatagan pud sa hustong renumeration.

Ang mga tawo karong panahona particular kaayo sa imong kahimtang diha sa katilingban. Kun nahisakop ka sa mga elite,elitist pud kaayo ang ilang pagtagad kanimo. Apan sa ebanghelyo karong Domingoha ang atong Ginoo nihimo og pagbuyag niadtong buot mapasidunggan bisan diha sa mga lingkoranan sa mga kombira.  Alang kanila mas maayo ang low profile kay diha lamang sa pagpaubos siya mapasidunggan ug matuboy kaysa magpataas apan diay siya mahagba ug maulawan. Kay ang magpaubos,ipataas ug ang magpataas ipaubos.