Mga kabalaka sa pagwagtang sa pork barel

Dili pa angayan nga maglumpayat ug maghugyaw sa kalipay  ang katawhan nga nagsuporta sa lakang nga gihimo ni Pangulong Benigno Noynoy Aquino III nga pagwagtang na sa hingpit sa Priority Development Assistance Fund (PDAF) sa atong mga senador ug kongresista.

Kun nganong dili pa angayan nga maglumpayat ug maghugyaw sa kalipay ang katawhan nga nagsuporta sa maong lakang sa presidente  tungod usab sa pipila lamang ka mga hinungdan sama niining mosunod …

1. Sa giduso nga gahin sa nasudnong kagamhanan maoy nalakip ang PDAF sa mga magbabalaod ug hayan nga  kaaprobahan nga dili papason.

2. Kun ang gahin sa PDAF sa mga magbabalaod nalakip sa  giaprobahan nga gahin sa 2014 hayan nga mausab lang ang pangalan ug ang pamaagi sa pagpagawas sa gahin.

3. Dili mahingpit ang pagwagtang sa pangumisyon  sa PDAF apan hayan nga kaminusan  lang kay gamay na man lang ang kamot nga modawat.

4. Kun mag-agi og ahensiya sa goberno sama sa DPWH ug uban pa ang  isumitir nga proyekto may kahigayonan pa gihapon nga mangayo og komisyon ang kongresista.

Ang dugang kabalaka sa lakang sa presidente nga pagwagtang sa PDAF sa mga magbabalaod mao usab kining mosunod:

1.  Ang kongresista nga dili alalay sa administrasyon dili makakuha og proyekto alang sa girepresentahan niining distrito.

2.  Sa pagwagtang sa PDAF sa magbabalaod  mahunong usab ang mga gipasiugdahan niining programa sama sa scholarship program ug medical assistance program sa kabus nga molupyo sa girepresentahan niining distrito.

3. Ang mga barangay kapitan sa kabarangayan sa nasud walay laing kaduolan sa pagkuha og gahin alang sa ipatuman nga proyekto sama sa pagpaayo sa ilang kadalanan, pag-abli og mga dalan, pagpalambo sa ilang kanal o pagpatukod og dugang lawak saringan sa ilang tulunghaan.