EDITORYAL - NGO wa susiha kun bogus ba o di?

Si Senador Jinggoy Estrada  nangatarungan  nga wa siya masayod  sa Non Government Organization (NGO) nga  gitugyanan niya  sa  iyang  pork barrel  kun tarong ba o di.

Katarungan  nga  hungaw  kaayo  ug  nagpasabot  lang  nga wala  siya’y  pagmahal   sa  kuwarta nga  gipiyal  kaniya.

Wa niya tan-awa  nga P200 milyones  ang  gipiyal  kaniya  sa gobiyerno  matag  tuig  sa  pagsalig  nga  motabang  sila  sa  kaayohan  sa katawhan.

Tungod kay  ingon  niini  ang  matang  sa mga senador  ug  mga  kongresista, angay  lang  sila  sa paggama  og  balaud  ug  di  na  sila  angay  pang  piyalan  og  kuwarta  sa gobiyerno.

Subra  sila  kadagko  og  suweldo, kuwartahan  na  silang  daan , unsa  pa  man  ang  ilang  gikinahanglan.

Nganong  mangita  pa  sila  og  problema  sa pag-ila  kunohay  og  proyekto  nga  gastohan  sa ilang  pork barrel. Unsa  may  kapuslanan  sa mga kapitan  sa barangay, mayor  sa lungsod  ug  siyudad ug  gobernador  sa lalawigan.

Di ba ang  maong  mga  opisyal  maoy  mopaila  og  mga  proyekto  sa ilang  lugar busa  igo na  nga  ang  kongresista  sa matag  distrito  nga  himuon  nilang  bata-bata pagtunol  sa ilang  mga  pangayoong  gasto  sa proyekto  ngadto  sa DBM.

Sa gihapon  kun  but-an  ang  maong  kongresista, duol  gihapon  sila  sa dughan  sa  mga  molupyo  kay   makatabang  man sila   sa LGU  sa maong  paagi.

Kini  tungod kay  di   na   sila  angay    nga    piyalan  sa  salapi  sa gobiyerno  ug  kalikayan  nila  ang  tentasyon  sa pagkiriw niini.