Demanding ka ba?

Agosto 25, 2013: Ikakawhaag-usa nga Domingo sulod sa tuig

Mga Pagbasa: Is. 66;18-21/Sal. 117/Heb. 12;5-7/Lk. 13;22-30

Matud pa anaa gyud nang demand. Kini tungod kay sa kalibutan anaa man ang mga standards nga angayang i-comply nato. Ingon usab niini ang pagsunod kang Jesu-Kristo ug sa iyang mga pagtulon-an. Anaa ang mga demands. Hagip-ot ang agianan, lisud ang padulngan. Mao nga dili tanan makatuman tungod kay gawas nga dili sila ganahan og kalisdanan, mas dali alang nila ang pagsubay sa dalan nga magdala og kalaglagan.Kay lagi ang maong dalan, Sayon, Lami, ug Dali mura og Salad.

Si San Agustin nagkanayon: “God created you without you, but He cannot save you without you!” Nga sa ato pa, mas maayo nga anaa pud ang element of human participation. Kun buot kang maluwas ug makasulod  sa ganghaan sa kaluwasan, nagkinahanglan kini og pagpili gikan sa imong bahin. Ayaw pag-presume nga maluwas ka bisan wala kay himoon. Labaw na ayaw pag-presume nga maluwas ka gumikan sa imong kaugalingong paningkamot. Busa, angay lamang nga mohimo ka sa imong desisyon uban ang pagkamanggihatagon sa kaugalingon: “Nga ang pagsunod kang Kristo Jesus dili diay usa ka sayon nga lakang. Lisud man tuod kini apan puno usab kini sa kahulogan.