Ang duol sa tinuod sa panagbangga

Nagkadaiya ang gipadayag nga kasinatian sa mga naluwas sa nalunod nga barko nga St. Thomas Aquinas sa 2Go Shipping human sa panagbangga nga nahitabo batok sa M/V  Sulpicio Express Siete niadtong Agosto 16 sa gabii niining tuiga.

Sa  nagkadaiyang gipadayag nga kasinatian sa maong trahedya sa kadagatan maoy mitumaw karon ang dakong epekto dili lang sa mga pamilya nga nahimong biktima kun dili lakip na usab ang panginabuhi sa mga Sugboanon ilabi na gayod ang mga mananagat ug manindahay og isda sa atong kamerkadohan.

Nunot niining maong kahimtang daw daghan pa gihapon ang wala masayod sa hinungdan sa maong panagbangga sa duha ka sakyanan sa kadagatan nga maoy atong kadakdakan sa mga pagmahay ug pagbasol.

Kini ang hinungdan nga daghan karon ang nakapangagpas nga ang duol sa tinuod nga ang  maong panagbangga maoy nahimong linugdangan sa nagdanghag nga mga tripulante sa duha ka mga sakyanan sa kadagatan.

Dugang duol sa tinuod nga ang kadaghanan sa nakasakay nga pasahero wala gayod magtuo nga mao kadto ang ilang dangatan ilabi na dihang  ilang nasayran nga pipila na lamang ka gutlo ang  ilang gipaabot modunggo na sa pantalan ang barko nga ilang gisakyan.

Ang laing duol sa tinuod nga daghan pa sa mga pasahero nga  gipangita sa nagmagul-anon nilang mga kabanay  nga nahiuban sa pagkalunod sa barko ug nagpaabot sa mga technical diver’s nga maoy mougkat kanila.