EDITORYAL - Ang tawong kuwartahan lisud pangitaon

Ang  mga wanted  nga kriminal  nga way kuwarta  dali  rang hikit-an  tungod  kay  wa  sila’y  ikagasto  sa  pagpausab  sa ilang  dagway.

Mahimong di  magpausab  sa hitsura  apan  sa  mga  gastuonon  sa  mga  tago-tago  aduna  sila’y  ikabuga  kay  may kuwarta.

Dinhi  sa Cebu,  usa  sa  wa na  igkita hangtud karon  kay  giingong  nagpausab  sa dagway  mao  kadtong  trabahante  sa  City Hall  nga may  cash  advance  nga dul-ang P20 milyones.

Nawagtang  ang  maong  babaye  ug  wa  na  usab  maugkat  ang  iyang kaso,  sa laktud  hingpit  na  nga  gikalimtan  karon  sa hukmanan.

Ingon  usab  kuno  ang  gibuhat  karon  sa  usa  ka dakong  negosyante  nga  maoy  mipadagan  sa  mga  pork barrel  nga  bali  og  P10 bilyones  sa  mga  magbabalaod.

Ang  mga  magbabalaod  nga way  lingaw , P200 milyones  nga  iya  sa senador   matag  tuig,  ug  P70 milyones  sa kongresista matag  tuig,  kay  way  schedule  kun  asa  ihatag  ang  ilang  pundo, didto  ilunod  sa kompaniya  nga way  ayo.

Nawagtang  ang  maong  salapi,  ug  mao  kini  ang  protestahan  sa  mga  nagpanikad  nga  mga  molupyo  sa Metro  Manila.

Ang  hingtungdang  negosyante  nag-atubang  na  sa kasong  plunder, apan  di  hikit-an  sa  mga  otoridad  sa NBI kay  nagpausab  na  kuno  sa dagway.

Ingon  niini  ang  kahimtang  sa nasud nga  kun  di  mabangkarota  mag-ilaid  sa kalisud  ilabi  na  ang  mga  kabus.