Hain ang oil spill boom sa PCG?
Ang Department of Environment and Natural Resources (DENR)-7 mibana-bana nga mokabat sa P6.5 milyones ang danyos sa kabakhawan didto sa Cordova ug Lapu-Lapu tungod sa oil spill nga mugna sa pagkalunod sa barko sa 2GO Shipping Lines usa ka semana na ang milabay dihang nabanggaan sa usa ka cargo vessel diha sa Lawis Ledge, ang bukana paingon sa mga pantalan sa dakbayan sa Sugbo.
Tungod sa kadako sa hulga sa kadaot nga mamugna sa oil spill, ang lokal nga mga opisyal nagkabuang sa pagpangita og paagi unsaon pagkontrolar ang pagkuyanap niini. Usa sa mga nahuna-hunaan nga pamaagi pagsanta sa oil spill mao ang pagbutang og mga oil spill boom gamit ang mga “indigenous materials†sama sa bunot, sako, buhok, ug uban pa nga mamahimong mosuyop sa lana.
Daghan ang mirespondi sa panawagan nga modonar sa ilang buhok aron magamit pagpasuyop sa lana nga miagas diha sa tubig. Gani ang mga kawani sa dakbayan sa Sugbo ug ang mga piniriso didto sa Lapu-Lapu City Jail nagpaopaw aron kapuslan ang ilang buhok.
Apan luyo sa atong kasayuran, dunay P60 milyones nga kantidad sa mga oil spill boom nga gipalit ang Department of Transportation and Communication (DOTC) alang sa Coast Guard niadtong tuig 2009.
Ang maong mga kahimanan gitan-ugan sa Coast Guard. Ang maong mga oil spill boom kabahin ni sa P719,562,860 nga kantidad sa mga lighthouse spare parts ug P319,000,000 nga kantidad sa oil spill equipment nga gipalit sa DOTC diin matud sa Commission on Audit gipaburot og maayo ang presyo.
Matud sa COA sa Audit Observation Report niini niadtong Marso 22, 2011 nga ang P319-million nga kantidad sa Marine Environmental Protection Equipment (MEPE) tataw nga gipaburot ang presyo ug hangtud sa P77 milyones. Ang giingon nga anomaliya sa pagpamalit og mga oil spill boom sa DOTC nahimo gani ni nga sentro sa imbistigasyon sa kongreso niadtong miaging tuig. Si Bayan Muna Party-list Rep. Teddy Casiño maoy nangusog aron maimbistigar ang maong tinunto.
Ambot unsay nahimong resulta sa imbistigasyon nga gipasiugdahan sa House Committee on Good Government and Public Accountability. Nahilom ra man sab ug wala tay nadunggan nga dunay napriso o ba kaha napasakaan og kaso.
Kaluoy ni Juan dela Cruz gikurakot na ang iyang buhis, giupawan pa sa iyang buhok aron magamit pagsanta sa pagkuyanap sa oil spill.
Hain man diay ning maong mga ekipo nganong wala man gamita sa Coast Guard? Matud ni kanhi DOTC Usec. Aristotle Batuhan kumpleto ang maong mga ekipo diha sa yarda sa coast guard dihang iya ning gisusi niadtong Septiyembre tuig 2011. Sukad niadto wala may nahitabo nga marine pollution dinhi sa Sugbo, apan nganong wala may nagamit ang Coast Guard?
* * *
Naguol ko nga nagbasa sa reaksiyon ni Gobernador Hilario Davide III sa tanyag sa usa ka kompaniya gikan sa South Korea nga maoy mogasto sa katukoran sa usa ka highway sama sa gidamgo niadto ni anhing bise gobernador Gregorio Sanchez.
Ang South Korean firm motukod niini nga way gasto ang gobyerno apan mokolekta sila og toll aron makabawi sa gasto.
Apan bugnaw pa sa simod sa itoy ang reaksiyon sa atong gobernador. Inay imbitahon dayon ang mga nitanyag alang sa maong proyekto aron masabutan ang mga pamaagi, ang gihimo sa gobernador igo lang giingnan nga mosuwat og formal proposal aron iyang maaksiyonan. Pastilan! Kita maoy nagkinahanglan, mas maayo nga kita maoy mopakita og interest!
- Latest
