EDITORYAL - Ang pagdinasmagay sa duha ka barko

Kun may dinasmagay  sa eroplano,  may  dinasmagay usab  sa  mga  barko.

Pulos  mga  lagpad kaayo  og  espasyo  sa  ibabaw  ug  sa ilawom  nga  way  problema  sa trapiko  ug  pila ray  eroplano  nga  mobiyahe  sa  matag  takna  sa kawangan, ingon  man  ang  barko  sa kadagatan.

Apan taliwala  sa kaluag  sa ilang  agianan, nganong  may higayon  man  nga  magkadinasmagay  sila.

Pangutana  kini  nga  sila  ray  maka-eksplikar  atubangan sa  mga imbistigador.

Sa  mga  sakyanan  sa yuta,  aw daghan  kaayo  ang  hinungdan  nga  magkadasmagay  kini.

Usa  niini  mao ang  kaapiki  sa dalan,  depektuso  ang  preno  sa sakyanan,  nagdanghag  ang  driver, nagduka ang driver,  hubog  sa bino  ug  gidiling  drugas  ang  driver  ug  uban  pa.

Apan  sa barko  nga  pulos  walay  depekto  ang  mga  sakyanan, apan  ang  mga kapitan  ug  ang  timonil  nga maoy nagdala   sa manobela, komusta.

Tinuod  nga  may  mga agianan  silang  subayon  ilawom  sa dagat, apan  sa ilang  kadagko ug  kabuntaog  og  lawas  magkakinit-anay  sila sa layo  pa  tungod  kay  way  mga  blind curve  ang  dagat.

Kun  di hubog, wa magduka,  ang  mga  kapitan  o  timonil  sa maong  mga  sakyanan, nganong  magkabangga man?

Kun  sa sakyanan  sa yuta  daghan  kaayong  hinungdan,  sa barko  dyutay ra   ug  ang  kadanghag maoy  nag-una.