EDITORYAL - Ang pagpangabit og bayot ug tomboy

Base sa batakang balaod ang  bana  nga makighilawas  sa babaye  nga di niya  asawa  kakasohan og concubinage.

Samtang  ang  asawa  nga  makighilawas  sa lalaki nga di  niya  bana, kasohanan  usab  og  adultery.

Ang  duha  pulos  silotanan  sa pagkabilanggo  kun  mamatud-an.

Apan  kun  ang  bana  makighilawas  og  bayot,  ug  ang  asawa   makighilawas  og  tomboy,  unsa  may  isilot  kanila?

Wa , kay wa  may  balaud  labot  niini. Apan  unsa  ba  kabug-at ang  maong  sala? Pareho  ba  kini  sa pakighilawas  sa  mga  minyo  ngadto  sa kaatbang  nila  nga  sex?

Kun   hisgutan  ang  kabug-at  niini, wa  kaayo  kini  mahimong  kumon  nga suliran  dinhi  sa nasud  hinungdan  nga  bali wa  sa balaud  ang  maong  sala.

Apan  sa  mga  nasud  nga  miuso  ang  same sex  marriage, wa bay  nabungkag  nga  pamilya  gumikan  niining  mga  kasoha?

May  misang-at na  og  balaudnon  karon  bahin  niini  sa senado  kansang  texto  nagsubay  sa  balaud kansang  tagsala silotanan  sa pagkapriso.

Kun  kini  magdulot og  pagkabungkag  sa pagpuyo  sa magtiayon  may  katarungan  nga  angay  himuong  balaod  ang  maong  balaudnon.

Kay  madugay  ug  sa madali  malagmit  muabot  ang  higayon  nga ang  gihimo  sa ubang  mga  nasud  sa gawas  nga  mopakasal  sa  managsamang  sex   mahitabo  usab  dinhi  sa ato.