Kalooy tawon

Walay trabaho kagahapon sa mga nagserbisyo sa kagamhanan mao nga wala na lang ko milakaw ug nakahigayon ko pagbasa sa report sa akong amiga nga si City Engineer Kenneth Carmelita Enriquez kabahin sa Status of Funded Projects gikan sa tuig 2010 hangtud sa 2013.

Pastilan tawon, nakapanglingo-lingo ko nga nagbasa. Ambot og si Mayor Michael Rama mibasa ba kaha sa maong report ug kun nakabasa siya unsa kaha’y iyang reaksyon.

Gikan kaniadtong 2008 hangtud karong tuiga, ang tanang funded infrastructure projects sa dakbayan miabot og P2,674,502,208. Sa laktud alang sa dili kaayo kabisado og numero – P2.6 Bilyones.

Kanindot kun mapatuman ang tanang proyekto ug tinud-on lang g’yud unta sa pagpatuman nga dili kay gitumong ra aron moburot ang bulsa sa mga kontraktor.

Apan nasubo ko tungod kay daghan pa kaayo nga mga proyekto, apil na kadtong gigahinan kunohay og pundo sa tuig 2012 nga hangtud karon wala pa ikapatuman kay ang rason? Walay kwarta aron ipatuman ang maong mga proyekto.

Dunay “note” sa report ni Engr. Enriquez nga pending pa ang pagpatuman sa maong proyekto “due to budgetary constraints” nga sa ato pa, walay pundo nga magamit niini.

Ang akong pangutana, mapatuman pa kaha kining maong mga proyekto? Dili nako matagsa-tagsa pagsuwat dinhi kun unsa kini kay tingali mahurot ang luna nga gitagana sa akong lindog.

Unya, duna sa’y mga proyekto nga gibutang nga kompleto na nga nahuman sa pagpatuman apan kadudahan, sama sa pipila ka “dredging projects” kon pagpalawom sa kasapaan.

Ang kanunay nako nga himoong ehemplo mao kining Parian Creek, kana ba’ng sapa nga nag-agi ilawom sa mga tindahan diha sa Colon ug dia milagbas kilid sa opisina namo sa Freeman sa D. Jakosalem paingon sa Pier 3.

Kun tan-awon nimo ang report ni Engr. Enriquez, nahuman na sa JJ&J Construction ang pagpalawom sa mao nga sapa nga gikontrata nila og P4,961,250 nga sa ato pa, hapit mo lima ka milyon ka pesos.

Nahuman na kuno kini sa pagpalawom kaniadto pa’ng Hunyo 25, 2012. Apan daghan ang mitug-an nako nga ang daplin ra man sa karsada ang gipalawman, wala man didto sa sudlonon nga bahin.

Unya, ang pagpalawom nga gikontrata og P4.9 milyones gikan ra sa MJ Cuenco Avenue paingon diri sa unahan og gamay sa D. Jakosalem Street, wala didto sa dapit sa Pier 3 nga maoy gawasanan sa tubig. Natural, inigbunok sa kusog nga uwan, suyla ang tubig diha sa karsada kay mabaw man ang gawasanan unta sa tubig didto sa bukana sa dagat.

Apan klarohon nako, wala makakwarta niini si Engr. Enriquez kay gani siya ang labing dato sa mga opisyal sa dakbayan. Wala la’y maayo nga pagsuperbisar sa pagpatuman sa project.