Pangandam sa katalagman
Dili tiaw ang suliran sa kalamidad tungod kay bugti niini ang posibling mga kinabuhi nga makalas gawas sa kadaot nga mamugna niini sa mga kabtangan.
Kini maoy hinungdan nga angayang mas palig-onon pa sa gobyerno ang mga programa sa pagpangandam sa bisan unsang kalamidad. Kini tungod kay pinaagi lang sa hustong preparasyon malikayan ang kinabuhi nga makalas sa oras sa katalagman.
Aron mapahugtan ang pagpangandam importante ang kooperasyon sa mga opisyal sa barangay. Kini tungod kay sila maoy mas labaw nga nahibawo sa mga dapit sa barangay nga piligroso.
Kun molihok ang tanang opisyal sa barangay pagtuman sa ilang gimbuhaton, malikayan ang pag-ungaw sa kakuyaw sa ilang mga molupyo. Dili kinahanglan ang dakong salapi gikan sa barangay aron maluwas sa piligro ang mga molupyo niini gikan sa kakuyaw nga dala sa trahedya kun dili panahon ug kakugi lang sa mga opisyal sa barangay pag-ila sa mga dapit nga delikado sa ilang barangay ug sa pagreport niini sa dakbayan o ba kaha sa mga opisyal sa lungsod aron matabangan pagpangita og solusyon.
Husto ang direksiyon nga gisubay sa bag-ong konsehal sa dakbayan nga si Dave Tumulak nga pugson ang mga barangay opisyal nga molihok pagpugong sa posibling katalagman.
Dili mahimo nga si Konsehal Tumulak lang ug ang iyang mga sakop ang saligan dinhi sa dakbayan pagpangandam sa posibling moigo nga katalagman. Iyang gikinahanglan ang ayuda gikan sa mga opisyal sa kabarangayan.
Mao nga angayang ipadayon ug tinud-on gyud ni Konsehal Tumulak ang iyang bahad nga pasakaan og kaso ang mga opisyal sa barangay nga nagpasagad sa ilang gimbuhaton.
Pinaagi sa pagpangusog ni Konsehal Tumulak nga molihok ang mga opisyal sa barangay pagpreparar sa katalagman sigurado ko nga malikayan ang mga kinabuhi nga makalas ug maminusan ang kadaot sa bisan unsang katalagman.
Hinaut isipon sa mga opisyal sa barangay nga seryoso nga warning ang pamahayag sa konsehal tungod kay nakaila kaayo niya. Dugay nami nga managhigala ni Konsehal Tumulak niadto pang manapon sa among pagka-polis reporter.
Busa nasayod ko sa iyang kinaiya nga kun mosulti iya gyud nga tumanon. Alang sa mga opisyal sa barangay, likayi nga maoy mamahimong sample sa mga kaso nga ipasaka unya ni Konsehal Tumulak batok sa mga tapulan ug nagmika sa ilang katungdanan.
* * *
- Latest
