Obligado ba ang kompaniya paghatag og sick leave ug vacation leave benefits?

Ang atong balaod naglatid sa mga benefits ug uban pang mga kaayuhan nga madawat sa usa ka empleyado gikan sa iyang kompaniya nga gitrabahoan. Apan ang paghatag og sick leave ug vacation leave benefits ngadto sa usa ka empleyado apil ba sa gimando sa atong balaod? Kana nga pangutana ang atong tubagon karon sa atong column.

Dear Atty. Divine,

Nagtrabaho ko karon sa usa ka kompaniya sa Mandaue City ug three (3) years nako nga nagtrabaho niining maong company. Ang ako lang ipangutana attorney kun sakto ba ning gibuhat sa among kompaniya nga wa may gihatag namo nga sick leave benefits samtang ang vacation leave lima ra ka adlaw. Sa akong nasayran attorney ang ubang kompaniya tag 15 ka adlaw man ang ilang vacation leave ug sick leave matag tuig. Tungod niini, sa higayon nga masakit mi ug mapugos mi sa pag-absent salary deduction gyud kay wa man mi sick leave. Dili ba diay obligado ang mga kompaniya sa paghatag og 15 ka adlaw nga vacation leave ug sick leave benefits? Hinaut nga imong matubag ang akong pangutana. — Eden

Dear Eden,

Kun imo gyung tan-awon ang atong Labor Code, wa gyud kini mag-obligar sa mga employers o mga kompaniya sa paghatag og vacation leave ug sick leave benefits. Basi sa Article 95 sa Labor Code kini nagkanayon: “a) Every employee who has rendered at least one year of service shall be entitled to a yearly service incentive leave of five days with pay.” Sa ato pa, ang gipangayo sa balaod nga hatagan og lima ka adlaw nga service incentive leave with pay ang usa ka kawani nga nakaserbiyo na og usa ka tuig sa maong kompaniya. Apan kun ang empleyado gihatagan na og vacation leave benefits nga dili mominus lima ka adlaw nga with pay, dili na kinahanglan nga hatagan pa siya og dugang lima ka adlaw nga service incentive leave kay makonsiderar na kining nakatuman na sa balaod ang maong kompaniya tungod sa paghatag og vacation leave. Hinuon bisan kun wa mag-require ang atong balaod sa vacation ug sick leave benefits kasagaran sa atong mga dagkong kompaniya nahimo na nilang company policy ang paghatag og 15 ka adlaw nga vacation ug sick leave benefits sa ilang mga kawani. Ang maong benefits ilang gilatid sa ilang employment contract, company policy o collective bargaining agreement. Busa ang maayo nimong buhaton karon mao ang pagtan-aw sa inyong company policy, employment contract or collective bargaining agreement kun aduna bay nalatid nga vacation leave ug sick leave benefits. Kun wala gani, kanang paghatag og lima ka adlaw nga vacation leave sa imong kompaniya mao na na ang nalatid sa atong Labor Code. Hinaut nga akong natubag ang imong mga pangutana. Daghang salamat ug God Bless!  â€” Atty. Divine

* *  *

Alang sa inyong mga pangutana, ipadala lang ang inyong suwat sa Legal Corner sa Banat News sa V. Gullas Street, Cebu City or email sa [email protected] ug akong tubagon ang inyong mga pangutana matag adlaw’ng Miyerkules ug Domingo pinaagi sa atong column.