Tommy gihugopan

Sa birthday party nila ni kanhi kongresista Tomas R. Osmeña ug sa asawa niini nga si Cebu City Councilor Margarita “Margot” Osmeña daghan kaayo nga mitambong.

Dunay mga mitambong nga barangay kapitan, mga department heads sa Cebu City Hall, mga opisyal sa lainlaing ahensya sa kagamhanan nga akong nakit-an.

Apan ang labing makapalipay nga balita mao ang gipahibalo ni Tommy nga wala na gayud siya’y cancer.

Gisaysayan kuno ni Tommy ang iyang doktor sa M.D. Andersons Cancer Center didto sa Houston, Texas nga ang rason nga napilde siya kay gipasiatab sa mga tigsabwag og inpormasyon sa iyang kontra nga himatyon na siya.

Nasayud man kita kun kinsa ang kusog kaayo nga midaut ni Tommy sa miaging kampanya ug kining maong mga tawo og tuod man gihatagan na sila og nindot nga mga pabor sa mayor.

* * *

Nalipay ko nga gihatagan g’yud og pagtagad ni Lapu-Lapu City Mayor Paz Radaza ang pagpanindot sa mga karsada diha sa iyang dakbayan, paingon na ngadto sa kabarangayan.

Usa kini sa gireport ni Radaza ngadto sa 20 ka nag-una nga magbubuhis nga dagku kaayo og gibayran nga buhis sa kagamhanan sa Lapulapu.

Matud ni Radaza nga mosamot gayud nga mapalambo pa niya ang Lapu-Lapu City kun mobayad na ang Mactan Cebu International Airport (MCIAA) sa iyang buhisanan sa Lapu-Lapu nga moabut og P1.7 Bilyones. Nagpatabang si Radaza sa kahugpongan sa mga magpapatigayon sa Lapu-Lapu nga unta moapil sila sa pag-awhag sa MCIAA nga mobayad na sila sa ilang buhisanan sa dakbayan.

Bitaw, tan-aw nako mobayad man ang Lapu-Lapu sa ilang buhisanan apan gitan-aw lang nila kun tukma ba g’yud kini kay duna man gud kadto’y hukom sa Korte Suprema nga “exempted” sila pagbayad og buhis.

Na hala, fight Mayor Paz!

* * *

Ang ako diay nga mga higala nga dagkung opisyal sa kapolisan mora’g nabalhin na man didto sa National Capital Region (NCR) ug ang uban nga dia pa, talibalhin na ‘sab.

Si Chief Inspector George Ylanan gidala diay ni Director Marcelo Garbo nga hepe sa Regional Special Operations Group (RSOG) sa NCR, sama sa katungdanan ni Ylanan dinhi sa PRO-7.

Ang higala nako nga dakung opisyal, dili lang usa nako ilhon, kuhaon usab diay ni Garbo kay adto ibutang sa Southern Police District (SPD) kay aron dali ra nga mahimong “heneral.”

Bilib g’yud hinoon ko ni General Garbo kay siya maoy nakahimo og paspas nga kampanya sa illegal nga sugal dihang siya pa maoy hepe sa PRO-7. Karong wala na si Garbo dinhi, unsay paniid ninyo, mibalik ba ang mga illegal nga sugal? I-report sa 0933-5700853.