Lunop, baha ug politika

Grabeng lunop ug baha ang akong nakita ug nahiaguman niadtong Sabado sa gabii. Sa sayong hapon nianang adlawa ang mga sakop sa Golden Boys Club nalingaw pa og tuki sa lakaw sa politika sa Sugbo ug sa tibuok nasud samtang naghigop og kape sa ilang naandang pundohanan sa White Gold Cafe.

Sa wala madugay nibunok ang kusog nga uwan nga nilungtad og hapit sa duha ka oras. Tungod niini naglunop ang mga karsada nga naglibut sa maong tindahan nga misaka labaw sa tuhod.

Kami si Atty. Amor Cañete ug Bernie Go kauban ang mga opisyal sa White Gold nga sila si Sonia Go, Viña Vallejos, Evelyn Anur, Pearl Natial, Jeanie Ann Calidguid, Nely Balili ug Concepcion Baba nababoy sud sa compound sa maong tindahan. Si Riza Bravo, ang bosswoman sa mga cashier, maoy nipagamit sa iyang cargo truck aron lang makalabang ang kadaghanan sa mga empleyado nga naghuwat nga mobahar ang tubig-lunop.

Sa dihang lawom na ang gabii nangarisgar kami sa pag-agi sa luyong karsada nga mas ubos ang tubig.

Samtang nakalikay kami sa baha, ang problema na usab mao ang grabeng kahuot sa trapiko tungod kay wala maato sa mga sakop sa City Traffic Operations Management (CITOM) ang pagbantay sa kadalanan.

Sama sa naandan, nag-inilogay ang mga drayber sa sakyanan tungod kay parehong nagdali pagpauli. Kalooy sa Dios, nakaabot ako sa among balay human sa hapit duha ka oras, nga naandan lang unta nakong daganon og 10 minutos.

* * *

Kanus-a pa man mahuman kining pamolitika dinhi sa Cebu City? Hangtud karon wala pa gayud maaprobahi sa mga konsehal nga sakop sa Bando Osmeña- Pundok Kauswagan (BOPK) ang gahin alang unta sa pagpatuman sa comprehensive drainage master plan ni Mayor Mike Rama.

Mao kini ang labing importanteng proyekto aron pagminus sa epekto sa grabeng uwan nga mao ang lunop ug baha.

Human sa eleksiyon, ato man gihapong makita ang kamot ni kanhi Kong. Tomas Osmeña nga "naglubag sa bukton" sa mga konsehal ug nagdiktar kun unsay ilang buhaton.

Sibilyan na si Tomas apan ambot og nganong kurog man gihapon kaniya ang mga konsehal sa BOPK?

* * *

Ang nakaingon sa grabeng lunop ug baha diha sa mga dalan duol sa SM, Radisson Blu Hotel ug White Gold Club mao kining lapok nga nagpundok (daw bukid) sa baba kon bukana sa Mahiga creek nga anaa mahimutang sa Cebu Port Authority (CPA).

Tungod kay dili na man libreng mobanlas ngadto sa dagat ang bul-og sa tubig sa maong sapa moawas kini ngadto sa mga dalan S. Osmeña ug Don Andres Soriano.

Sumala sa R.A. 7621, ang territorial jurisdiction sa CPA nag-apil sa mga pwerto, kadagatan, suba, kasapaan ug ubang navigable inland waterways sulod sa lalawigan sa Sugbo, Cebu City, ug tanang mga urbanized cities.

Gitawag na sa Cebu City hall ang atensiyon sa mga opisyal CPA kalabut niini apan wa kini manumbaling. Ang gikinahanglan mao ang pag-dredge sa maong dapit nga sayon kaayong magastuhan sa CPA.

Akong tawgon ang atensiyon sa akong higala, CPA Gen. Manager Dennis Villamor ug ang mga sakop sa board sa pag-atiman sa ilang gimbuhaton nga nag-apil sa paglimpiyo sa waterways sama sa Mahiga creek nga ubos sa ilang hurisdiksiyon.

* * *

Happy birthday ngadto kang U.S. Airforce Col. (Retired) James Ford nga nagsaulog sa iyang adlaw’ng natawhan niadtong Lunes. Siya ang pinanggang kapikas ni Mrs. Lorenza Ford nga tag-iya og usa ka hotel dinhi sa Cebu. Si Col. Ford maoy usa sa duha ka mga squadron commanders sa US Airforce nga nagbase sa Mactan Airbase panahon sa Vietnam war.

Email: [email protected]