Iyahay sa baha, basura ug trapiko

Managsama og problema silang Barangay Kapitan Jessielou Cadungog sa Tejero, Dakbayan sa Sugbo ug Barangay Kapitan Nelson Rubio sa Umapad, Dakbayan sa Mandaue: Ilang mga barangay nga pulos nahimutang sa labing ubos nga bahin maoy kinaham nga sangkoanan sa bangis nga baha sa kasilinganang mga barangay.

Bisan unsaon nila sa pagpanlimpiyo ug pagpadako ang ilang mga kanal, malubong gihapon sa lapukon nga baha kay ilang mga molupyo di kaato og pamunit sa basura ug ang ilang drainage system di kasuyop sa natingob nga baha gikan sa tanan nga mas naibabaw nga mga barangay. Maong nitiyabaw sila nga di mahimong sila ray pasagdan sa ilang mga silingan.

* * *

Kalbaryo nilang Rubio ug Cadungog mao say gipas-an sa kadagkoan sa Cebu Technological University (CTU) Main Campus, nga nahimutang pila lang ka metro gikan sa Plaza Independencia. Mas hulpa nang daan ang ilang nahimutangan maong bahaan na gyud niadto pa. Nisamot sila kaapiki dihang gitukod ang subway paingon sa South Road Properties (SRP).

Wa nay kalutsan ang baha nga awas sa palibot nga mga barangay. Bisan gipadak-ang mga imburnal, mas lawom nang baha kay mobalik rang tubig. Nagusbat ang multi-milyones pesos nilang rubberized oval nga bag-ong nahuman. Mga payag-payag palibot sa gibahaang oval nakaaghat sa mga tinun-an pag-upload sa YouTube sa masulub-ong video sa “CTU Beach Resort.”

* * *

Mao ni nakapakumbinser ni Mandaue City Mayor Jonas Cortes paghangop sa gisugyot nga pagbanhaw sa Metro Cebu Development Authority. Nga gisuwayan pagtukod ni Kongresista Raul Del Mar sa una apan nabasura tungod sa panagsungi sa lokal nga mga opisyal unsaon pag-apud-apod ang mga gahom ug responsibilidad.

Si kanhi mayor Tommy Osmeña supak nga managsama ra silang tagsa og boto ni anhing mayor Bebs Pepito sa Consolacion. Si Pepito nisumbalik pagsalikway sa sugyot nga iyang lungsod ang tam-okan sa tanang basura sa Metro Cebu. Nanghinaot si Cortes nga mas bukas na rong panghunahuna sa bag-ong hugpong sa lokal nga mga opisyal atubangan sa nagkagrabeng suliran sa baha, basura ug trapiko.

* * *

Nipasabot si Cortes sa Tubag! sa ABS-CBN Channel 3 nga di mahimong mag-iyahay ang lokal nga mga opisyal sa Metro Cebu pagduma sa ilang drainage system ug traffic system. Matud niya makawang lang ang pagpadako sa mga imburnal sa Mandaue (nga karon mas dako pa gani kay sa mga gitaod sa Department of Public Works and Highways sa nasudnong highways) kun way himuon si Cebu City Mayor Mike Rama sa baha gikan sa Banilad, Talamban ug ubang mga barangay sa ibabaw.

Nagkasabot na silang Cortes ug Talisay City Mayor Johnny Delos Reyes sa panginahanglan pagsumpay sa traffic systems sa mga dakbayan ug kalungsoran sa Metro Cebu. Hinaot susama’g panghunahuna silang Rama ug ubang lokal nga mga opisyal.

* * *

Email: [email protected].