Damgo ni Sipalay

Wala koy legal nga punto nga nakita sa paningkamot ni Talisay City legal officer Alfredo Sipalay nga makuha ang giingong porsiyon sa South Road properties nga ilalum kuno sa hurisdiksiyon sa maong dakbayan.  

Ato nang nahibaw-an nga titulado na ang tibuok SRP ilalum sa dakbayan sa Sugbo. Ug klaro nga ang tag-iya sa kinatibuk-an niini mao usab ang dakbayan sa Sugbo. Ug unsa pa man ang rason ni Sipalay sa iyang tinguha pag-ugkat na usab  niining hagbay rang nalubong nga isyu?

Unsa kahay nasulod sa ulo sa maong abogado niining iyang lakang? Wala kaha kini nagdamgo?

Daghan hinuon ang nakumbinse nga adunay personal nga motibo si Sipalay pag-ugkat na usab sa maong isyu. Kini aron siguro paglawgaw na usab sa relasyon tali sa duha ka mga silingang dakbayan.

Kini tungod kay nganong gidiretso man ni Sipalay og handos ang cease and desist order ngadto sa dakbayan sa Sugbo sa proyekto niini diha sa SRP nga walay kalabotan mismo ang iyang amo nga si Talisay City Mayor Johnny delos Reyes?

Nahingangha intawon ang pobreng mayor. Wala kuno siya’y ideya sa maong cease and desist order. Kini nagpasabot lamang nga nagbuo-buot diay si Sipalay sa maong desisyon. Mora na hinuon siya’g mayor sa dakbayan sa Talisay.

Apan unsay sangpotanan niining maong kalamboan? Alang nako magpukaw hinuon kini sa nagusbat nga relasyon tali sa duha ka siyudad. Ug nga dili kini magdala og maayong bunga alang sa dakbayan sa Talisay.

Kahinumdoman nga nagtinguha na kaniadto ang Talisay pagkuha sa porsiyon sa SRP nga gi-claim niini nga nahisakop pa sa teritoryo niini. Apan pildi kini tungod kay gipaboran sa national government ang siyudad sa Sugbo pinaagi sa paghatag og titulo sa kinatibuk-ang SRP.

Apan karon nga titulado na ang SRP ilalum sa ngalan sa dakbayan sa Sugbo, mosaler kaha kining pagkamang ni Sipalay pagkuha sa porsiyon niini? Tan-aw ko dili ug nag-usik-usik lamang siya sa panahon.