Ang bitin

Gikahadlokan ang sawa kon dagkong bitin. Ang normal nga buhaton sa mga tawo kun makakita’g bitin labi na kun kini grabeng dakua mao ang pagpatay niini.

Apan ang Department of Environment and Natural Resources  (DENR) ug ang mga wildlife conservationist miawhag sa katawhan nga dili patyon ang maong bitin. Ang saktong buhaton mao ang pagpahibawo kanila nga dunay maong bitin o sawa nga nakahatag og kakuyaw sa mga lumolupyo sa dapit.

* * *

Giprotehian ang kinabuhi sa bitin ug gani ang mga nadakpan nga bitin kun dunay samad o kun nagkinahanglan og maayong pag-atiman, atimanon pag-ayo sa mga ekspertong moalima og bitin kinsa kasagaran niini mga beterinaryo kon doctor of veterinary medicine.

Ang mga nadakpan nga bitin atimanon pag-ayo, hatagan og bitamina, panindotan ang kondisyon sa lawas unya buhian balik sa lasang.

* * *

Sus, di ba na binuang?” matud ni Nang Sebia, silingan namong manghihilot.

Kanatong way konsern sa wildlife mura’g binuang. Apan dili baya. Ang bitin, labi na katong mga dagko kaayo, makatabang pagpatunhay sa environment kon kalikupan. Gani gikaguol man sa mga wildlife conservationist ang nagkamenos na kuno ron sa populasyon sa mga bitin o sawa.

Mao nga kutob sa madakpan mga bitin kon halas ilang paayuhon ang kondisyon sa panglawas ug buhian kini pagbalik sa lasang.

* * *

TRIVIA. Pahalipay sa among igsuong mantalaan The Freeman nga misaulog sa ika-94 ka tuig nga pagmantala...unom ka tuig na lang ug moselebrar na kini sa iyang sentenaryo. God bless