Parking nga sayop

Matag agi nako panahon sa gabii unahan sa Lahug Elementary School masinati nako ang kahuot sa sakyanan. Usa nga rason mao ang problema sa trapiko didto sa eskena sa Sitio Sudlon apan kining imnanan nga  anaa unahan sa tunghaan sa Lahug nakapasamot sa problema.

Mao diay kini ang La Vie Paririenne, kang kansang parking area “diagonal type” ug wala masubay sa lagda, gawas pa ang panguwahian nga bahin sa sakyanan nga mo-parking anaa na sa karsada nga peligro kaayo madam-agan. Mao kini ang rason nga makamugna og problema sa kahuot sa sakyanan kay inig-abot diha, mopahinay ka man g’yud unya likayan nimo nga dili maigo ang luyo nga bahin sa mga sakyanan nga gi-parking sa parking area nga wa masubay sa lagda.

Bag-o lang kining maong imnanan nga nag-operate diha, ambot og duna ba kaha kini permit kay ang atbang niini tunghaan ra ba, unya sa unahan ang Temple nga mora’g nasulod pa sa 100 meter nga gilay-on.

Kaniadtong Sabado nagsemento na gayud sila sa ilang parking area ug mao nga akong gipahibalo ang kadagkoan sa CITOM. Ang ordinansa mao nga kadtong mga balay-patigayon, ilabi na kadtong anaa mahimutang daplin sa karsada, nga gihimo lapas sa 1992 dili gayud tugotan nga makabutang og parking area nga diagonal type.

Ang gitawag og “diagonal type” mao kanang mo-parking nga moiwad lang ba gikan sa karsada ug nga iniggawas kinahanglan ka pa nga moatras. Apan nganong gitugotan man kini diha? May nakakwarta? Midawat mo’g suborno para lang aprobahan ang ilang sayop nga parking?

 Kun madumbolan sa mga sakyanan kining mga sakyanan nga anha mo-parking nga ang luyong bahin anaa pa sa karsada, dili kaha magpabayad ang mga tag-iya?

Gawas niining La Vie Paririenne, ang parking area sa building nga gigamit kaniadto sa Social Security System (SSS) diha sa Gorordo Avenue eskena Escario, labaw pa sa diagonal ang ilang parking, kay gibabag g’yud ug ang sidewalk nga agianan unta sa mga tawo giukopar sa sakyanan.

Awhagon nako si Mayor Michael Rama nga ipatul-id kining hiwi nga binuhatan sa maong mga magpapatigayon. Nakabantay ko nga ang mga kawani sa City Hall nag-ukon-ukon sa paghimo’g aksyon niining mao nga kahiwian da, ambot ngano kaha.

Husto kaha ang akong pagduda nga nakadawat na sila og suborno mao nga dili na sila moaksyon? Atensyon, OBO Chief Engr. Kenneth Enriquez, aksyoni palihug kining maong isyu.

Pinili ba ang inyong pagpatuman sa balaud?

* * *

 Pagbantay mo niining modus. Dunay mga drayber sa taksi nga kun mobayad ang pasahero og tibuok P1,000 ila dayong ilisan og piki nga kwarta sama sa nasinati sa taga Nasipit, Talamban adtong Biyernes.