Mabuhay!!!

Ugma maoy ika-94 ka tuig nga anibersaryo pagkamugna sa The Freeman isip maoy labing karaan nga pamantalaan sa dakbayan sa Sugbo. Dungan sa pagkayab sa bandila sa The Freeman ugma, yukboan nako sila si Sir Jose “Dodong” Gullas ug Sir Miguel Belmonte kay sila daku kaayo og nahimo sa among kalampusan.

Una, si Sir Dodong maoy mipadayon sa naputol nga pagdumala sa iyang uyoan nga si kanhi senador Paulino Gullas sa pamantalaan nga The Freeman.

Bisan nagkalisud-lisud ang The Freeman kaniadto, wala gayud pul-i si Sir Dodong sa pagkuot sa iyang kaugalingong bulsa, aron makapalit og mga kinahanglanon ang pag-imprinta sa mantalaan ilabi na ang sweldo sa mga kawani.

Unya, mikalit lang pagtungha si Sir Miguel, ang tag-iya sa higante nga pamantalaan sa nasud – ang Philippine Star Group of Companies – nga mialalay dayon sa The Freeman.

Kalit lang mibarug nga maisogon ang The Freeman. Swerte kaayo ko nga nahimong usa sa mga kawani sa The Freeman kay gikan sa among pag-antos kaniadto, karon gigantihan kami sa dagku nga sweldo ug ubang mga benepisyo.

Dili na lang ko motug-an kun pila na ako ka tuig nga miserbisyo sa The Freeman. Ang mga kauban namo nga reporters karon wala gayud makasuway sa kapait nga among nasinati kaniadto.

Kami si Sir Jerry Tundag magkataw-anay lagi mi nga maghandum sa among kaagi. Apan alang nako mas nindot nga nakasinati kami og kalisud kaniadto kay diha maila nga “diehard” kami sa The Freeman.

Dunay newspaper nga kaniadto mikombinsir nga pabalhinon ko ug gitanyagan og arang-arang nga sweldo, apan bisan og akong gipasalamatan apan gipasabot nako nga maikog ko nga mobiya sa The Freeman.

Husto ang akong gihimo kay karon, wala ko magmahay sa akong sweldo sa The Freeman, ilabi na nga gitugotan kami nila nga makasuwat sa Banat News nga lahi usab ang sweldo, ug wala usab did-i nga motrabaho sa radyo.

Mabuhay ang The Freeman!!!!

* * *

Nalipay ko kay gipahibalo ni CITOM Executive Officer Rafael Christopher Yap kagahapon nga banhawon na nila ang kampanya batok sa mga sakyanan nga ipataka lang pagparking sa karsada panahon sa gabii.

Angay lang uy kay hasol kaayo kining maong mga sakyanan. Sundon unta nila ang uban nga mangita gayud og dapit nga kaparkingan sa ilang mga sakyanan.

Unya kining mga PUJ ug taxi, ngano gud tawon nga anaa man kini sa karsada nga pag-aplay nila og prangkisa nanumpa man sila nga duna sila’y grahe.

Atensyon LTFRB, direktor Ahmed Cuizon, Gising!!!