Personal nga kinaiya batok kinaiya sa kinabag-an

Dili ikalimod nga dako usab og kalambigitan ang grupo diin sakop ang imong anak diha sa pag-umol sa iyang kinaiya. Kini tungod kay nagkinahanglan ang imong anak o mga anak og pagdawat sa ubang mga bata. Pangandoy niya nga dili siya mamahimong deviant kon sukwahi gikan sa uban.  Apan ang kamatuoran mao nga dili tanang gikauyonan sa grupo ang maisip natong husto. Nahimong balansayon karong mga panahona ang “katilingbanong pagpanikas” Community Cheating diha sa tagsa-tagsa ka mga klase. Ang imong anak nga imong gitudloan og pagkamatinud-anon ang usahay bation og kahasol ug kalibog kun ang iyang pundok na mismo ang mopugos kaniya sa pakig-abin sa ilang hiwi nga mga binuhatan kay kondili mamahimo siyang isalikway o dili ba kaha ang pagatawgon nga sipsip ug walay pagpakabana sa panginahanglan sa iyang klase. Labaw na nga malisud alang kaniya ang pagtug-an ug pagbulgar sa maong binuhatan kay nagpasabot man kini nga siya makontrahan sa iyang mga kaubanan. Nga sa ato pa ang mga matang sa mga higala nga nagpalibot sa imong anak  sa mosugot kita ug sa dili ang nakatampo sa matang sa kinaiya ug batasan nga pagapuy-an sa imong anak ugma damlag. Mao nga mahinungdanon kaayo alang sa ginikanan nga iyang susihon kun unsang matanga sa mga higala ang nagpalibot sa iyang anak. Mas maayo nga himoon kini samtang sayo pa aron malikayan ang mga mas dagko pa nga kadaot nga mahiagoman kun ugaling pasagdaan ang bata nga motubo sa ingon niana lamang nga pagpabaya.