Gutom ang adunahang Sugbo

Sa iyang panamilit pagkapupos sa iyang tulo ka sunudsunod nga termino, niinsistir si kanhi gobernador Gwen Garcia nga bisan sa pangangkon ni Bise Gobernador Agnes Magpale nga bangkarota ang panudlanan sa Kapitolyo nagpabilin ang Sugbo nga maoy labing adunahang lalawigan sa tibuok nasud.

Nahuman na lang ang kasamtangan nga pagduma ni Magpale sa Kapitolyo ug nahibalik na lang si Garcia sa katungdanan sa pagkatapos sa unom ka buwan niyang suspenso, wa pa maklaro kinsa nila ang nagsulti sa tinuod. Sa akong pagsuwat ini, ang nibanos nga pamunoan ni Gobernador Junjun Davide padayon pang nagsusi sa mga transaksiyon nga gisudlan ni Garcia. Apan pasiunang kasayuran nakapakumbinser ni Davide nga mas dako ang utang kay sa nahibiling kuwarta sa Kapitolyo.

* * *

Makapa-kuwestiyonable sa pangangkon ni Garcia ang mosunod nga kasayuran gikan sa tulo ka tinubdan:

• Sugbo maoy usa sa labing iwit sa pagpalambo sa panglawas sa iyang katawhan, segun sa Food and Nutrition Research Institute (FNRI) nga ubos sa Department of Science and Technology (DOST);

• Sugbo maoy numero uno sa malnutrisyon sa tibuok Central Visayas, segun sa tinuig nga Operation Timbang nga gipasiugdahan sa National Nutrition Council (NNC); ug

• Sugbo ug Kabisay-an maoy labing taas og ang-ang sa malnutrisyon sa tibuok nasud, segun sa quarterly nga surveys sa Social Weather Stations (SWS).

* * *

Gipahibawo sa NNC nga sa tibuok rehiyon, nia sa Sugbo ang dakbayan nga naghupot sa labing daghan nga malnourished nga kabataan: Ang Dakbayan sa Naga, nga giduma sa usa sa labing lunod patay nga alyado ni Garcia, si Mayor Val Chiong.

Sa pikas nga bahin, nakaplagan sa NNC nga ang labing gamay og mga bata nga nahiagom sa malnutrisyon sa tibuok Central Visayas mao ang Dakbayan sa Bogo, nga giduma sa usa sa labing higpit nga kaatbang ni Garcia, si Mayor Junnie Martinez. Sa upat ka lalawigan sa rehiyon, ang Bohol kansang gobernador, Edgar Chatto, di sama ka tigpagawal ni Garcia, maoy labing gamay og mga kaso sa malnutrisyon.

* * *

Labaw sa kakuwang og kasayuran sa mga ginikanan sa tukmang pagkaon alang sa ilang mga anak, mao ang kakuwang nila og kuwarta nga ikapamalit ning labing batakan nga panginahanglan. Nga makapadugang pagpaburot sa eskandalo: Nganong sa kaadunahan sa Sugbo, wa may igong pagkaon ang iyang kabataan?

Diin man diay gastoha ni Garcia ang binilyon ka pesos nga pundo sa Sugbo? Natilok ba diay sa pagpalit sa yuta ilawom sa dagat sa Tinaan, Naga ug sa pagtukod sa Cebu International Convention Center (CICC)? Nga mumho na lay nahibilin alang sa labing gipanggutom niyang mga molupyo? Nataligam-an ba lang? O gituyo aron nga mahimong burong ang umaabot nga henerasyon ug mahimo lang ulog-ulogan sa way kapuslanan mga salida ug suroy-suroy?

* * *

Email: [email protected]