EDITORYAL - Human trafficking may kasulbaran ba?

Dili na bag-o kanato ang mga balita bahin sa mga “cyber sex  porns,” mga KTV bars nga gipangronda tungod sa pagpasalida og malaw-ay nga shows, pag-ronda sa mga babayeng nalambigit sa prostitusyon ug mga illegal recruitment nga pulos magbansiwag sa mga pamantalaan.

“Tip of the iceberg.” Kini mao ray paghulagway sa mga advocates kontra human trafficking dinhi sa Pilipinas. Matud pa nga wala kaayo mahatagi og pokus sa media ang tinud-anay nga unod luyo niining  maong mga  balita.

Apan sa mga manggawas nga mga  balita ang kakabus maoy sagad nga himuong rason sa mga madakpang traffickers, mga commercial sex workers, trafficked persons ug uban pa.

Apan sa obserbasyon sa International Justice Mission (IJM) dinhi sa Pilipinas dili lang ang kakabus maoy tinud-anay nga hinungdan niining pagdaghan sa mga kaso sa human trafficking.

Ang IJM usa ka non-governmental organization nga nagtutok sa mga kaso sa pagpangabuso sa mga sektor sa katilingban nga wala mahatagi og atensyon sa ilang tagsa-tagsa ka mga gobiyerno sa nagkadaiyang nasud. Dinhi sa Pilipinas , napokus ang mga programa sa IJM niining problema sa human trafficking.

Matud pa sa ilang director, Atty. Andrey Sawchenko, dili ang kapobrehon maoy rason nganong dunay human trafficking. Matud niya dunay mga nasud nga susama ra sa Pilipinas (apil third world countries) nga wala magkaproblema sa human trafficking.

Usa sa nakitang ugat niini mao ang problema bahin sa kultura, kakuwang sa edukasyon, kakuwang sa oportunidad nga makasulod og desenteng trabaho ug ingon man lig-ong mga balaod nga makapanalipod sa mga ‘vulnerable’ o kadtong sayon ma-abusong sektor sa katilingban.

Kining maong “vulnerabilities” maoy nataligam-an sa pipila ka mga tigbalita sa ilang mga sinuwat bahin sa human trafficking.

Ang human trafficking adunay daghang dagway, kini sama sa force slavery, prostitusyon, pagpangilad, pagbiyahe sa mga tawong ilegal nga nanulod sa ubang nasud, pag-exploit sa mga bata, paggamit sa mga bata sa giyera, ug uban pa.

Sa laktod pagka-estorya ang human trafficking mao ang usa ka matang sa krimen nga diin ang tawo mismo maoy gi-negosyo tungod sa ilang kahuyang ug kawala nay kapaingnan maong bisan ang uban nasayod silang giabuso sila, ilaha na lang kining gidawat.

Kung tuohan ang gipanulti sa IJM, kini nagpasabot nga duna pay wala mahibaw-i ang publiko nga angayang masayran bahin sa problema sa human trafficking. Pinaagi niini, mas ma-address sa gobiyerno ang panginahanglan aron di modaghan o mograbe ang problema.