SK papason?
Gitinguha sa Commission on Elections nga bungkagon sa hingpit ang Sangguniang Kabataan kon SK. Usa sa mga commissioners sa Comelec nga si Lucenito Tagle mitug-an nga ilang gitun-an ang posibling pag-awhag sa kongreso sa hingpit nga pagpapas sa maong programa.
Bug-at ang mga rason ni Tagle nganong ilang gitinguha ang pagpapas sa SK. Una: Nahimo ning “breeding ground†sa kurakot nga mga opisyal sa gobyerno. Ikaduha: Gihimo sab kining “training ground†sa mga sakop sa political dynasties sa nasud. Ikatulo: Walay maayong resulta o programa nga nabuhat ang mga opisyal sa SK. Ikaupat: Nag-usik-usik lang ang maong programa sa pundo sa gobyerno.
Uyon ang Comelec sa obserbasyon sa Parish Pastoral Council for Responsible Voting kon PPCRV nga ang SK gigamit sa mga sakop sa dynasty aron mansohon ang mga sakop sa ilang pamilya sa politika.
Kamatuoran niini mao nga sagad sa mga kandidato o napiling opisyal sa SK mga anak sa kapitan, mayor, kongresista, ug uban pang mga piniling opisyal.
Tukma sab kaayo ang ilang obserbasyon nga ang SK nagtudlo lang sa mga batan-on sa pagpangurakot. Unsaon nga ang mga dagkong politiko moapil man sa pagmaniobra.
Ila man gud nga magamit ang mga batan-on sa konseho, labi pa og sikit kaayo ang gidaghanon sa numero sa managkaribal nga partido. Tiaw mo bay mismo sa SK election duna nay pinalitay nga mahitabo.
Sagad sa buhaton sa mga ginikanan sa kandidato sa SK mao ang pagpanghakot sa mga botante sa bisperas sa eleksiyon ug lamingon ang mga batan-on hangtud sa election day aron pagsiguro nga dili makuha sa kontra. Gawas nga lamingon pamayran pa og kwarta.
Husto ang Comelec sa ilang tinguha nga wagtangon na lang sa hingpit ang SK. Kun buot huna-hunaon wala sab gyud tinuoy nahimo ang programa. Unsaon man gud nga sagad sa mga napili wala pa man gyud intawo’y buot. Sa akong tan-aw murag ang uban mao pa may pagkakat-on pagpamurol.
Usik kaayo ang kwarta nga atong gigasto sa eleksyon ug way kapuslanan ang programa. Matud sa Comelec P4.3 bilyones ang pundo nga ilang gitagana alang sa moabot nga barangay ug SK elections. Kun ingon niini ka dako ang kwarta nga magasto sa eleksyon mas maayo pa nga gamiton ang maong pundo pagpalambo sa kabarangayan.
* * *
- Latest
