Masulob-ong buhatan ni Gwen
Samtang nanumpa si Hilario “Junjun†Davide III pagka gobernador sa Sugbo, ang buhatan ni kanhi gobernador Gwen Garcia nakapahinumdom nako sa Malakanyang. Dihang nilayas nang diktador nga si Ferdinand Marcos ug ang mga sakop sa iyang pamilya ug nidaog nang People Power Revolution 27 ka tuig ang nilabay. Nakasud ko sa buhatan ni Garcia atol sa kinapungkayan sa iyang gahom. Kanunay’ng gitak-opan ang mga ganghaan ug may mga nag-atang sa matag agianan. Imong pamatyag nga dakong prebilehiyo kun makadawat og imbitasyon. Nabantang nakong mga kawani nga kuwang na lang og diyutay nga mohawok sa lapalapa ni Garcia ug ang naghinobra nga kaluho nga way kinutoban.
* * *
Maong makapalandong ka sa akong kakugang pagkakita nga nagnganga ang tanang ganghaan ug mga bintana, wa nay guwardiya ug bukas na alang ni bisan kinsang manguryuso. Lahi sa Malakanyang niadtong 1986 wa magkayamukat ang kabtangan sa buhatan ni Garcia. Way timaan sa pagdalidali. Naatlan lang namo nga nagsige pa og panghakot sa personal niyang kabtangan. Wa na ang mahalon nga mga lamesa ug mga lingkoranan nga giangkon ni Garcia. Nahibilin hinuon ang mga tapok sa baga nga naglut-od nga abog nga wa maabot sa silhig sa niaging siyam ka tuig nga pamunoan. Kay usa sa nanghakot niingon nga way espesyal nga lamesa ug lingkoranan si kanhi gobernador Pablo Garcia.
* * *
Espesyal nga frames sa nagkalainlain nga mga dagway sa ikaduhang Garcia nga tagduma sa Kapitolyo nagyaka sa sawog. Higanteng kuwadro sa hulagway ni Garcia nga nagsayaw uban sa kabataan atubangan sa karaang simbahan gipasandig na lang sa bungbong. Natultolan namo ang tinagoang pultahan sa buhatan ni Garcia nga mohatod nimo sa sekretong hagdanan paingon sa ubos ug laing sekretong agianan paingon sa taas. Nga gituohan nga maoy giagian ni Garcia aron nga di makita sa taga gawas nga di diay tinuod nga nagpabilin sa iyang buhatan sa pagsukwahi sa suspension order sa Malakanyang batok niya.
* * *
Among kauban wa kapugong pagpangindahay nga ang mga politiko, di lang ang mga lunod-patay ni Garcia kun dili apil nang nagsugod og baiid ni Davide sa una pa lang mga takna sa iyang pamunoan, makakita sa masulub-ong kahimtang sa buhatan ni Garcia: Aron kapahinumdoman nga ang politikanhong gahom kasamtangan lang ug nga tanang katungdanan bisan unsa kataas may kinutoban; busa mahimo bang mohunong na sa pagpahimus, pagpamintaha, pagpangabuso, pagpangyatak, pagpanggukod, pagpanikas ug pagpangawat samtang nagtungkawo sa ilang buhatan? Maayong timaan nga wa magsapayan si Davide nga di dayon kapuli sa buhatan ni Garcia ug nga gilabay sa karaang session hall sa Provincial Board. Mas maayong timaan nga siya’y labing sayo nga nagtikaw-tikaw sa Kapitolyo, mas una kay sa mga opisyal ug kawani nga mas luho og mga buhatan.
* * *
Email: [email protected].
- Latest
