Palahi ni Caminero

Samtang ang uban naningkamot pagdapit og kadagkuan sa Manila nga maoy mopapanumpa kanila, nagpalahi si Rep. Wilfredo Caminero, mipapanumpa kaniya, usa ka kapitan sa barangay, si Paz Caminse sa Linut-og, Argao.

For me, mas makahulogan kini alang sa mga yanong lungsoranon, labi na sa taga-barangay ug sa tagabukid. Daku kini’g epekto sa mga tawo nga nagpili kaniya. Ug ang dapit nga iyang gipapanumpaan, duol sa taga-bukid, mga 23 ka kilometro gikan sa Poblacion.

Kun sa lungsod kono siya magpahorar, dili kono makatambong ang taga-mountain barangays. “I want to get closer to the people near my heart. My work is here and not in Congress, ” nagkanayon si Caminero, himself a farmer.

Atong ma-imagine nga kasagaran sa mga Kongresista, of course, dili tanan, magpasinaw lang sa ilang mga lingkoranan sa Kongreso, di na pakita sa ilang mga konstituente … until the next election. Pastilan!

Tapus na ang eleksyon, tapus na ang kampanya, apan, matud ni Caminero, magpadayon ang iyang pagduaw ug pakighimamat sa katawhan, labi na sa mga halayong barangay, inay nga adto lang siya magyampungad sa kaulohan … maghuwat kun kanus-a ipanghatag ang pork barrel.

Mao unta kini ang buhaton sa ubang mga Kongresista. Maglikaylikay na man hinoon. Di na matawgan sa telepono, mag-usab nag numero sa cellphone. They should spend more time with their constituents, rather than magpahayahay lang with their colleagues. Muadto lang sa Kongreso kun mo-file na og balaudnon … o mo-privilege speech, o mosalmot sa mga debate on some controversial issues.

Kasagaran nila, manguli sa tagsatagsa nila ka distrito, weekends, Sabado ug Domingo. Unya, wala may office hours, ug family ug rest day man kono kini alang kanila … busa, dili gihapon sila igkita.

Unya, ipadayon ni Rep. Caminero ang tinguha ni Noy Pabling, ang pag-divide sa second district into two districts. Maayo. Ang uban, tungod kay plano ug proyekto sa kaatbang sa politika, dili kini padayonon … hadlok nga ang credit adto punta sa orihinal nga nagplano sa proyekto.

Sama sa nahitabo sa kang Tingting nga Students’ Dormitory, nga nindot kaayo nga proyekto, daghan untang mga estudyante sa lalawigan ang mabulahan ug makapahimulos … apan, wala ipadayon sa mga Garcia, kay dili ilang ideya. Dili sila buot nga ang credit adto punta ni Tingting.  Ambut unsay hunahuna ni Gov. Junjun ini?

Si Caminero, wala maghunahuna nga ideya ni Noy Pabling ang pagsiak sa Segundo distrito .. kun dili maoy iyang gihunahuna ang kaayohan sa lungsod. Ug lagmit, dili na siya mo-file pa og laing balaudnon, kondili, iya na lang tingali i-followup ang kang Noy Palbing nga bill.

Tinuod, daku kaayo ang second district. Lisud ang pag-accommodate sa tanang yangungo ug mga panginahanglan sa mga molupyo ini.

Bisag late na, sa giingon nga “better late than later” … Congratulations, Rep. Wilfredo Caminero!