Mga hagit sa bag-ong liderato

Nagsugod kagahapong adlawa sa ilang mga katungdanan ang mga napili sa miaging piniliay ug sa paglingkod sa ilang mga bag-ong termino ug katungdanan miuban usab kanila ang hagit sa ilang pangatungdanan.

Sa dakbayan sa Sugbo ang dakong hagit ni Mayor Mike Rama ug Bise Mayor Edgardo Labella mao ang konseho nga kontrolado sa ilang kaatbang sa politika. Kun unsaon nila pagdaug ang dughan ug kasing-kasing nga samaran tungod sa dili pa dugay nga nahuman nga piniliay aron mosuporta kini kanila mao ni ang atong atangan.

Hinoon ang presensiya sa oposisyon sa konseho sa dakbayan sa Sugbo dili sa tanang higayon makadaut sa mga Sugboanon hinoon makatabang kini sa pagpanalipod sa iyang interest gikan sa walay mga hinungdan nga laraw ug plano sa nagdala sa rinda sa iyang kagamhanan kana kun ang oposisyon nga mga konsehal mohimo sa ilang kaugalingon nga mga fiscalizer ug dili mga obstrakyonista.

Ato na nga nasinati ug dili pa dugay sa atong panumdoman ang nahitabo sa lalawigan sa Sugbo diin nakapalit kini og yuta nga nahimutang ilawom sa dagat sa kantidad nga hapit moabot sa usa ka gatos ka milyon ka pesos tungod kay ang naglingkod nga mga sakop sa junta provincial pulos ra kauban sa partido maong wala nay nanukidoki sa proyekto nga miresulta sa pagkaalkanse sa lalawigan.

Sa panahon ni kanhi Mayor Alvin Garcia ang dakbayan sa Sugbo nakapalit usab og minilyon nga kantidad sa yuta nga maoy pabalhinan sa mga gipangdemolis nga molupyo sa dakbayan apan wala kini mabalhini tungod kay bisan ang mga unggoy mahadlok nga mopuyo sa lugar tungod sa iyang pagkapang-pang. Nahitabo kadto tungod kay walay mga konsehal nga nagdukidoki sa proyekto kay silang tanan kauban ra sa partido.

Maong nakauyon ako karon sa kasamtangang set-up sa konseho ug ehekutibo dinhi sa dakbayan sa Sugbo tungod kay makaseguro na kita nga mapanalipdan na gayod ang interest sa mga Sugboanon gikan sa mga dili maayo nga mga proyekto ug makaseguro na usab kita nga hinashasan ang mga mahimong hukom sa atong mga opisyal sa dakbayan sa Sugbo. Pero sa ako nang gikaingon mahimo lamang kini kun ang mga oposisyon nga konsehal maoy ipatigbabaw sa ilang dughan ang ilang obligasyon ngadto sa katawhang Sugboanon ug dili ang ilang pagyukbo ug pagluhod ngadto sa ilang amo ug Ginoo.