Ang kahugtanon sa pangandoy

Dili mahinungdanon ang unsa may gidak-on o kahabog sa atong pangandoy. Ang katumanan niini mag-agad kun unsa kahugot o kalig-on ang pundasyon sa pagtuo nga makab-ot mo kini.

Tungod kay aduna may nangandoy nga igo lang sa pamasin nga sa hunahuna pa lang gibati nag katalaw sa pagbuhat. Nga kasagaran, ang pangandoy himuon lang sama sa damgo kutob ra sa paghinanok nga way buhat.

Hinuon, may pipila sab nga grabe ang paningkamot. Gi-ungad sa risgo ang lawas apan sa gihapon nahulog sa way kapuslanan. Kay gikutasan nga naluya sa pakigdumog sa kawad-on. Wala na niya maabot ang usa ka lakang sa katumanan sa iyang pangandoy.

Nataligam-an nga ang pagkab-ot sa pangandoy dili lang sa kusog sa hunahuna kun di sa inantigo nga diskarte sa lihok aron ka moabot sa padulngan.

Sa imong panlimbasog nga di ka maugtas, iseguro nga matutokan mo pag-ayo ang imong tumong nga masentro  perming nakatumbok sa imong kab-oton.  Dili kay magbalhin-balhin la’g sige’g sugod hangtud mapul-an ka.

Matngonan nga di ka mosibog kun moabot ang kalisud. Hapsaya ang isip ug mamalandong nga may mga paagi pa nga ikaw makasugakod. Sama sa lumba ang kinabuhi busa ayaw papildi.

Ang kapait nga masinati mo, angay ikalipay kay mabatyagan mong dili ka gayud mapakyas nga maangkon ang gipangandoy. Ayaw ka ugtas sa kalisud kay pagsulay kana. Isipon mo kini nga usa ka hagit nga mopabaskug sa pagpadayon.

Nga unsa may dangatan, dili ka padaug sa mga tentasyon aron gub-on ang maayo mong dalan paingon sa kalamposan, aron kuhaan ka’g kusog sa imong paglaum.

Ang pagsukod sa kahugtanon sa pangandoy aron angkunon nga malamposon ang kalipay sa kinabuhi, di lang diha sa katakos sa kaugalingong paningkamot.

Kay wa gyud tay mahimo kun di nato i-apil sa pagbakos ang mga maayong hiyas gikan sa kahitas-an, nga maoy mogiya nga dili kita mapakyas. Kay anaa Kaniya ang gahum o yawe sa katumanan sa atong mga pangandoy.

Ang isig katawo maoy himuon Niyang kasangkapan alang sa imong kalamboan. Buhata ang kinaiya nga balaanon, madanihon sa katarung aron ikaw katabangan sa pangandoy mo. Apan kun gihatagan man kita, di mo usab ihikaw ang pagtabang sa uban ug labaw sa tanan ang pagpasalamat sa Kahitas-an.