Hinaut nga makalahutay

Inig takdo sa alas dose karong udto, magsugod na ang termino sa mga bag-ong opisyales sa nasud. Tulo ka tuig na usab nato silang hukman sa ilang pangatungdanan.

Sa dakbayan sa Sugbo, moarangkada na ang ikaduhang termino ni Mayor Michael Rama. Kini human iyang gipildi sa niaging piniliay ang tang-an nang si Kongresista Tomas Osmeña, ang kanhi mayor nga wala pay pildi.

Hinuon daghan ang nakaayon sa unang termino ni Rama. Daghan ang mibilib kaniya tungod sa nagkalainlaing mga proyekto nga iyang gi-implementar. Ang beautification project ug pag-aspalto sa mga kadalanan ang atong nasaksihan karon. Paspas ang pagpatuman sa maong mga proyekto, butang nga wala pa sukad mahimo sa nangaging mga administrasyon.

Hinuon manghinaut lamang kita nga magpadayon ang maayong mga proyekto ni Rama niining iyang ikaduhang termino. Hinaut nga dili gayud molubad ang pagpakitang gilas niining atong mayor.

Basin baya kun maayo lamang sa primerong termino si Rama. Ug nga niining iyang ikaduha, basin baya kun mibahar na ang iyang mga paningkamot alang sa kalamboan sa dakbayan sa Sugbo. Atong bantayan kun susama pa ba sa una ang kaabtik sa mayor pagdughit og mga proyekto alang sa kabaranggayan. Kun mahimo pa kini ni Rama, nan makaingon kita nga maayo gayud ang iyang pagdumala sa siyudad.

Hinuon wala ako magduda sa katakos ni Rama pagpadagan sa dakbayan. Ang ako lang nga basin unya kun suyopon siya sa sistema sama sa uban nga maayo lamang mopaukyab apan dili diay makalahutay.