Laing patyunon

Naa na say laing Pinay nga patyunon didto sa China tungod gihapon sa pagsuway og ismagol og drugas sa maong nasud.

Naninguha lang gihapon ang atong kagamhanan nga masalbar kining atong igsuon. Kay lagi ato mang igsuon.

* * *

Apan lahi ang baruganan ni Senador Tito Sotto. Suma sa balita, dili buot si Sotto nga luwason kining maong sad-an nga Pinay kay matud niya gahi og ulo.

Ang punto ni Sotto mao nga sayud ang tanan sa ka istrikto sa Insek bahin sa ilang balaud kontra sa ilegal nga drugas.

Ug sayud usab ang tanan sa tinguha sa atong kagamhanan nga likayan sa atong mga OFW ang drug trafficking.

Apan naa gihapoy mosalikway sa maong tinguha sa gobiyerno. Naa gihapoy, sa paggamit sa pulong ni Senador Sotto, mga gahi’g ulo.

* * *

Ang kalisud sa panginabuhi sa atong nasud mao kunoy hinungdan nganong naay mga kaigsuonan ta nga mosugal sa ilang kinabuhi sa pagpayuhot og ilegal nga drugas sa China. Matud pa sa uban: “Mas maayong mamatay nga puno sa kuwarta ang bulsa kay sa mamatay nga busloton ang bulsa.”

“What kind of a philosophy is that,” matud pa sa usa ka sociology professor. “It should be unacceptable to all right thinking people.”

* * *

Hasul kaayo alang sa atong gobiyerno ang pagsuway og salbar sa usa ka Pinoy nga hukman og kamatayon tungod sa sayop nga binuhatan. Apan tungod kay kinabuhi man sa usa ka igsuon ang nakataya, dili na lang balihon ang kahasol.

* * *

TRIVIA. Komusta sa mga higala natong drayber sa taxi ug PUJ. Pagmatngon sa pag-drayeb ning panahon sa ting-uwan ug bagyohon pa. Salamat sa inyong suporta sa Banat News.