Posisyoning na para sa 2016

Wala pa gani makasugod paglingkod para sa lain nilang termino nangandam na sila si Mayor Jonas Cortes sa Mandaue ug Kongresista Luigi Quisumbing sa ikaunom nga distrito sa lalawigan sa Sugbo alang sa piniliay sa tuig 2016. Kini ang akong nasagap nga kasayoran gikan sa akong mga tigpaniid sa dakbayan sa Mandaue.

Sigun sa akong nasayran ang mayor ug ang kongresista mag- ilis og posisyon sa tuig 2016 diin ang kongresista ang magpapili sa pagka mayor sa Mandaue ug ang mayor mao ang magkongresista sa ikaunom nga distrito. Kining maong kasabotan palig-onon sa duha ka mga politiko pinaagi sa pagsuporta sa ilang mga batos ning nagsingabot nga piniliay sa barangay karong Oktubre 28, 2013.

Ang duha ka mga politiko nga kaalyado sa mga Ouano dili mosuporta sa mga batos sa naulahi tungod kay ila nang napanglantawan ang kandidatora sa numero unong konsehal sa dakbayan sa Mandaue nga si Lolipop Ouano Dizon sa pagka mayor sa dakbayan. Kun madayon si Dizon ug Quisumbing ang magtigi sa pagka mayor samtang ang laing kaalyado ug suod sa mga Ouano nga si magpapatigayon Glenn Soco ang ikabangga ni Mayor Jonas Cortes sa pagka kongresista.

Tungod niini akong napanglantawan nga ang hugot nga panagtigi sa mga kandidato sa nagsingabot nga piniliay sa barangay sa dakbayan sa Mandaue mao usab ang hugot nga panagtigi sa mga higanting politiko nga mao ang mga Ouano, Cortes ug Quisumbing. Nga sa ato pa kun atong tutokan ug tugkaron ang atong makita ning umaabot nga barangay eleksyon sa dakbayan sa Mandaue mao ang proxy nga kombati tali sa tulo ka mga higanting politiko nga ato nang nanganlan.

Ang nasagap natong kasayoran murag mitukma sa mga panghitabo sa bag-o pa lang nahuman nga lokal nga piniliay diin giingon nga gi-junk ni Mayor Jonas Cortes sila si Teddy Ouano nga nagpapili pagka bokal ug Lolipop nga nagpapili sa pagka konsehal sa kataposang segundo nga nahabilin sa wala pa magsugod ang piniliay. Pero ang pag-abandonar ni Mayor Cortes sa duha ka Ouano wala magsilbi tungod kay pulos sila nag-una sa mga pinakadaghan og boto nga nahipos kun ikomparar sa ubang mga midaug nga kandidato.