Ed Habin

Daku ang akong kahibong ngano nga sa kapungot tingali ni Gov. Gwen (ambut kinsa ug unsa gyuy iyang nasuk-an), si Ed Habin may nasugamak sa maong kasuko! Sa nakaila ni Habin, lagmit mao usab kini ang ilang gibati. Of all people, si Habin gyud?

Sa akong nahibaw-an, siya ang budget officer panahon pa nila ni Gov. Lito Osmeña, Tingting de la Serna, Pabling Garcia, hangtud na ni Gwen, hangtud nga mi-retire diin gitudlo siya nga Provincial Administrator. Ako gani siyang gikomedyahan nga mo-apply ko pagka-Assistant Provincial Administrator. Di mahimo kay de la Serna akong apilyedo.

Lagmit, before ni Lito, diha na si Habin sa Kapitolyo. Ang kadugayon sa iyang pag-alagad sa Kapitolyo, naghulagway sa kamatinud-anon ug katarong sa iyang pagserbisyo sa lungsod.

Maoy hinungdan nga daghan ang natingala ngano nga siya gyud! Naa man tingali diha sa Kapitolyo nga mas angayan pang palagputon kay ni Habin.

Anyway, ang tawo mabiktima lang usahay sa kahigayonan, sa waay klarong hinungdan. Ako bitaw, waa gyud ko makatungha sa DAP (Development Academy of the Philippines) tungod kay gidudahan ko nga Coryista. Paglingkod ni Cory, una niyang gihimo mao ang pag-abolish sa among position. Usa ko sa napalagpot, ug nahibilin ang mga Marcoista. Biktima sa kahigayonan. That’s life.

Mi-suggest kong incoming Governor Junjun Davide nga kun mahimo i-reinstate si Habin. Lagmit, nag-usab siya sa iyang cell no. kay waa man siya motubag. Sa una, tubag dayon. Ako sang gi-suggest nga iyang ipadayon ang kang Tingting nga Students’ Dormitory kay daku kaayo nig ikatabang sa mga estudyante gikan sa probinsiya. Waa say tubag.

Nganong motubag man pud?

* * *

Niay pahinumdom ngadto sa mga ginikanan nga aduna pay mga anak nga nagtungha pa labi na sa primary ug sa elementary – hangtud na sa high school. Giingon dinhi, atong  kutloon: 

“Too much TV threatens attention span.”  Sa ato pa, ang subrang pagtan-aw sa TV, makaagaw sa atensiyon sa bata. Sa mga pagtuon nga gihimo, nakita nga ang subrang pagtan-aw sa television either sa screen o sa computer, ug ang pagpunay og duwa sa mga video games, duna kini dautang epekto sa kabataan, o sa mga young adults.

Busa, kinahanglan magmabinantayon ang mga ginikanan. Daghang magtutudlo ang mireklamo bahin sa attention problem sa mga estudyante. Ug makadungog kita nga daghang mga estudyante ang mag-cutting classes o mo-absent gyud tungod kay mag-internet sa silingan ra sa eskwelahan nga internet café. 

Maayo unta’g istriktohon gyud nga walay internet shop nga ibutang duol sa eskwelahan. Kusog kaayo ang tentasyon ini. Ug kun na-addict na ang bata, dili na kini maka-resist.

Busa, parents, beware!